कृषी व पशुसंवर्धन विभागाच्या योजनांची शेतकऱ्यांना माहिती
सुकळी, ता. मुक्ताईनगर | प्रतिनिधी : महाराष्ट्र शासनाच्या कृषी विभागांतर्गत कृषी तंत्रज्ञान व्यवस्थापन यंत्रणा (आत्मा) यांच्या वतीने दि. ८ सप्टेंबर २०२६ रोजी मौजे सुकळी येथे श्री. माणिक युवराज पाटील यांच्या प्रक्षेत्रावर दुग्ध व्यवसाय व प्रक्षेत्र भेट या विषयावर प्रशिक्षण कार्यक्रमाचे आयोजन करण्यात आले.
कार्यक्रमात तालुका कृषी अधिकारी श्री. अभिजीत शिंदे यांनी कृषी विभागाच्या विविध योजना तसेच शेतकऱ्यांसाठी उपलब्ध असलेल्या योजनांची सविस्तर माहिती दिली. कृषी विज्ञान केंद्र, ममुराबाद येथील श्री. किरण मांडवडे यांनी गायी-म्हशींचे संगोपन, दुग्ध व्यवसायातील नियोजन तसेच कुक्कुटपालनाबाबत शेतकऱ्यांना मार्गदर्शन केले.
पशुधन विकास अधिकारी श्री. सलीम तडवी यांनी पशुसंवर्धन विभागामार्फत राबविण्यात येणाऱ्या विविध योजनांची माहिती देऊन शेतकऱ्यांनी या योजनांचा लाभ घ्यावा, असे आवाहन केले. प्रशिक्षणादरम्यान दुग्ध व्यवसाय अधिक फायदेशीर व शाश्वत करण्यासाठी पशुधनाचे योग्य संगोपन, व्यवस्थापन आणि उपलब्ध शासकीय योजनांचा लाभ घेण्याबाबत मार्गदर्शन करण्यात आले.
कार्यक्रमाचे सूत्रसंचालन कृषिमित्र श्री. गजानन पाटील यांनी केले. यावेळी मुक्ताईनगर येथील पशुधन विकास अधिकारी डॉ. स्वागती मॅडम यांची उपस्थिती होती. कार्यक्रमाचे नियोजन श्री. युवराज पाटील यांनी केले, तर आभार प्रदर्शन आत्माचे सहायक तंत्रज्ञान व्यवस्थापक श्री. विनोद सैदाणे यांनी केले.
यावेळी गावातील उपसरपंच, पोलीस पाटील, प्रगतिशील शेतकरी तसेच बहुसंख्य शेतकरी बांधव उपस्थित होते. प्रशिक्षणादरम्यान शेतकऱ्यांनी दुग्ध व्यवसाय, पशुसंवर्धन आणि कुक्कुटपालनासंदर्भातील विविध बाबी जाणून घेत तज्ज्ञांकडून मार्गदर्शन घेतले.
