प्रश्नमंजुषा स्पर्धेत विद्यार्थ्यांचा उत्स्फूर्त सहभाग; मराठी भाषेचे ऐतिहासिक महत्त्व आणि वैभव विद्यार्थ्यांसमोर उलगडले
वंधली, दि. ३ ऑक्टोबर २०२६ (प्रतिनिधी) : साई विद्यालय, वंधली येथे ‘अभिजात मराठी भाषा दिवस’ मोठ्या उत्साहात साजरा करण्यात आला. याचवेळी विद्यालयातील इयत्ता दहावीची विद्यार्थिनी कु. अक्षरा मरसकोल्हे हिचा वाढदिवसही शिक्षक, शिक्षकेतर कर्मचारी व विद्यार्थ्यांच्या उपस्थितीत उत्साहात साजरा करण्यात आला.
कार्यक्रमाच्या अध्यक्षस्थानी विद्यालयाचे मुख्याध्यापक श्री. प्रविण बरबटकर होते. आपल्या अध्यक्षीय भाषणातून त्यांनी ‘अभिजात मराठी भाषा’ या विषयावर विद्यार्थ्यांना मार्गदर्शन केले. मराठी भाषेचा इतिहास, साहित्यिक परंपरा आणि भाषेचे वैभव याबाबत त्यांनी विद्यार्थ्यांना माहिती दिली. तसेच कु. अक्षरा हिला वाढदिवसानिमित्त शुभेच्छा दिल्या.
यावेळी श्री. वाटेवार सर आणि कु. बरडे मॅडम यांनीही मराठी भाषेचे ऐतिहासिक महत्त्व व समृद्ध परंपरेविषयी आपले विचार मांडले. कार्यक्रमाचे प्रास्ताविक श्री. पाटील सर यांनी केले.
‘अभिजात मराठी भाषा दिवस’निमित्त विद्यालयात विद्यार्थ्यांसाठी विशेष प्रश्नमंजुषा स्पर्धेचे आयोजन करण्यात आले होते. या स्पर्धेत विद्यार्थ्यांनी उत्स्फूर्त सहभाग घेत मराठी भाषेविषयीचे आपले ज्ञान आणि आवड व्यक्त केली.
भाषेचा गौरव आणि विद्यार्थिनीचा वाढदिवस अशा दुहेरी आनंदाच्या वातावरणात झालेल्या या कार्यक्रमात शिक्षक, शिक्षकेतर कर्मचारी आणि विद्यार्थी मोठ्या संख्येने सहभागी झाले होते.
