दिवाळीपर्यंत कर्जमाफी जमा करा; अन्यथा ३० ऑक्टोंबर पासून रस्ता रोको आंदोलनाचा कुणबी सेनेचा सरकारला इशारा!.
बाळासाहेब शिंदे, अतनूर / प्रतिनिधी
सरकारने जाहीर केलेल्या कर्जमाफी योजनेला मोठा कालावधी उलटून गेला असला, तरी हजारो पात्र शेतकऱ्यांच्या बँक खात्यावर अद्यापही कर्जमाफीची रक्कम जमा झालेली नाही. यामुळे ऐन रब्बी हंगामाच्या तोंडावर बळीराजा पुन्हा एकदा तीव्र चिंतेत सापडला असून, बँकेचे उंबरठे झिजवूनही पदरी निराशाच पडत असल्याचे चित्र आहे. दिवाळीपर्यंत कर्जमाफी जमा करा; अन्यथा ३० ऑक्टोंबर पासून रस्ता रोको आंदोलनाचा कुणबी सेनेचा सरकारला इशारा एका निवेदनाद्वारे देण्यात आला आहे.
निवेदनात पुढे म्हटले आहे की, बँकांचे उंबरठे झिजवण्याची वेळ शेतकऱ्यांना आली आहे. शासनाने कर्जमाफीची घोषणा केल्यावर शेतकऱ्यांमध्ये आनंदाचे वातावरण होते. प्रशासनाकडून पात्र शेतकऱ्यांच्या एक व दोन याद्याही जाहीर करण्यात आल्या. त्यातही अर्धवट शेतकरी दिसून येते. अजुनही ८० टक्के शेतकरी कर्जमाफी योजनेपासून लांबच राहिले आहेत. मात्र, तांत्रिक अडचणी आणि संथ प्रशासकीय कारभारामुळे प्रत्यक्ष रक्कम बँक खात्यात वर्ग झालेली नाही. खरीप हंगाम हातातून गेल्यानंतर आता रब्बी हंगामासाठी बियाणे, खते खरेदी करायची कशी, असा गंभीर प्रश्न शेतकऱ्यांसमोर उभा ठाकला आहे. तसेच तांत्रिक अडचणींचा खोळंबा झाला असून मिळालेल्या माहितीनुसार, ‘आधार प्रमाणीकरण’ न होणे, बँक खात्याशी आधार लिंक नसणे आणि पोर्टलवरील तांत्रिक त्रुटी यांमुळे हजारो शेतकऱ्यांचे पैसे अडकून पडले आहेत.
अनेक शेतकरी दररोज सेवा सहकारी सोसायट्या आणि राष्ट्रीयकृत बँकां व जिल्हा मध्यवर्ती सहकारी बँकांमध्ये चकरा मारत आहेत, परंतु बँकांकडून “वरतून अद्याप निधी आला नाही” किंवा “तांत्रिक काम सुरू आहे” अशी त्रोटक उत्तरे दिली जात आहेत. कुणबी शेतकरी संघटनेचे नेते विश्वनाथ पाटील यांनी प्रस्तुत निवेदनाद्वारे शेतकऱ्यांची मुख्य मागण्या सरकारकडे सांगितले आहे की, त्वरित निधी वितरित करुन पात्र शेतकऱ्यांच्या खात्यावर कोणत्याही अटींशिवाय तातडीने कर्जमाफीची रक्कम जमा व्हावी. बँकेकडून अडवणूक थांबवावे, नवीन पिकासाठी तातडीने पीक कर्ज उपलब्ध करून द्यावे. तसेच विशेष शिबिरे आयोजित करावीत आणि तांत्रिक त्रुटी दूर करण्यासाठी प्रत्येक गावात किंवा बँकेत विशेष शिबिरांचे आयोजन करण्यात यावे.
“कर्जमाफीच्या आशेने आम्ही जुने कर्ज नील होण्याची वाट पाहत आहोत. नवीन कर्ज मिळेना आणि पदरचे पैसे संपले. सरकारने घोषणा केली पण बँकेत गेल्यावर पैसे आले नसल्याचे सांगितले जाते. आम्ही जगायचे कसे?”
— जे.जी.शिंदे, बी.जी.शिंदे अतनूर येथील व्यतिथ शेतकरी कर्जदार
आता या प्रकरणात शासन आणि बँक प्रशासन तातडीने लक्ष घालून शेतकऱ्यांना दिलासा देणार का, याकडे संपूर्ण शेतकरी वर्गाचे लक्ष लागले आहे.
