क्रॅबी (थायलंड) :
थायलंडमधील क्रॅबी येथे पार पडलेल्या ‘ओशनमॅन क्रॅबी २०२६’ या जागतिक दर्जाच्या खुल्या जलतरण स्पर्धेत पनवेलच्या न्यू होरायझन्स पब्लिक स्कूलचा १३ वर्षीय जलतरणपटू तनय तुषार लाड याने उल्लेखनीय कामगिरी करत २ सुवर्ण आणि १ कांस्य अशी एकूण ३ पदके जिंकून भारताचा तिरंगा अभिमानाने फडकावला.
१९ वर्षांखालील गटात तनयने पहिल्याच दिवशी ५०० मीटर (ओशनकिड्स) स्पर्धेत अवघ्या ६ मिनिटे ५७ सेकंदात अंतर पार करत सुवर्णपदक पटकावले. त्यानंतर २ किमी (स्प्रिंट) स्पर्धेतही उत्कृष्ट कामगिरी करत दुसरे सुवर्णपदक आपल्या नावावर केले.
दुसऱ्या दिवशी झालेल्या ५ किमी ‘हाफ ओशनमॅन’ या आव्हानात्मक शर्यतीतही तनयने दमदार प्रदर्शन करत कांस्यपदक जिंकले. एकाच आंतरराष्ट्रीय स्पर्धेत ३ पदके जिंकणारा तो सर्वात लहान यशस्वी भारतीय खेळाडू ठरला आहे.
तनय हा न्यू होरायझन्स पब्लिक स्कूल, पनवेल येथे इयत्ता ८ वीमध्ये शिक्षण घेत असून, त्याला आंतरराष्ट्रीय जलतरणपटू रुपाली रेपाळे व अनिरुद्ध महाडिक यांचे पलावा येथील ‘रुपाली रेपाळे स्विमिंग अकॅडमी’मध्ये मार्गदर्शन लाभत आहे.
‘ओशनमॅन’ ही जगातील प्रतिष्ठित खुली जलतरण स्पर्धा असून ती २५ हून अधिक देशांमध्ये आयोजित केली जाते. या स्पर्धेत केलेल्या यशस्वी कामगिरीमुळे तनय लाडने आंतरराष्ट्रीय स्तरावर आपली ठळक ओळख निर्माण केली आहे.
