सेलू | प्रतिनिधी : क्रीडा व युवक संचालनालय, वर्धा अंतर्गत सेलू येथील क्रीडा संकुलात आयोजित तालुकास्तरीय कराटे स्पर्धेत हिंगणी येथील यशवंत विद्यालयाच्या विद्यार्थ्यांनी उल्लेखनीय कामगिरी करत यश संपादन केले.
१४ वर्षे वयोगटात विद्यालयातील दोन विद्यार्थी व दोन विद्यार्थिनी विजयी ठरले असून, त्यांची जिल्हास्तरीय स्पर्धेसाठी निवड झाली आहे. तसेच १७ वर्षे वयोगटात एक विद्यार्थी व तीन विद्यार्थिनींनी यश मिळवत जिल्हास्तरीय स्पर्धेत प्रवेश निश्चित केला.
या यशस्वी विद्यार्थ्यांना गावातील कराटे प्रशिक्षक सलीम शेख, क्रीडा शिक्षक चौधरी सर तसेच मयूर देवडे यांचे मार्गदर्शन लाभले. त्यांनी विद्यार्थ्यांचे अभिनंदन करून पुढील स्पर्धेसाठी शुभेच्छा दिल्या.
शाळेचे मुख्याध्यापक श्री. ठाकरे सर यांनी विजयी विद्यार्थ्यांचे पुष्पगुच्छ देऊन स्वागत व अभिनंदन केले. जिल्हास्तरीय स्पर्धेतही विद्यार्थ्यांनी उत्कृष्ट कामगिरी करावी, अशी अपेक्षा त्यांनी व्यक्त केली.
या यशाबद्दल शाळेतील शिक्षक, शिक्षिका व शिक्षकेतर कर्मचाऱ्यांनी विद्यार्थ्यांचे अभिनंदन केले. विद्यार्थ्यांच्या या कामगिरीमुळे यशवंत विद्यालय, हिंगणीच्या शिरपेचात आणखी एक मानाचा तुरा रोवला गेला आहे.
