जाफराबाद | प्रतिनिधी : तालुकास्तरीय शालेय क्रीडा स्पर्धेत न्यू हायस्कूल, जाफराबादच्या विद्यार्थ्यांनी दमदार कामगिरी करत विविध क्रीडा प्रकारांत तालुक्यात अव्वल स्थान मिळविले. या कामगिरीच्या जोरावर पाच विद्यार्थ्यांची जिल्हास्तरीय स्पर्धेसाठी निवड झाली आहे.
४०० मीटर धावण्याच्या स्पर्धेत भूषण साबळे याने तालुक्यात प्रथम क्रमांक मिळवून जिल्हास्तरीय स्पर्धेसाठी पात्रता मिळवली. सुरज भालके याने ३००० मीटर धावण्यात प्रथम, तर १५०० मीटर धावण्यात तृतीय क्रमांक मिळवला.
१४ वर्षांखालील गटातील ६०० मीटर धावण्याच्या स्पर्धेतही शाळेच्या विद्यार्थ्याने तालुक्यात प्रथम क्रमांक मिळवत जिल्हास्तरीय स्पर्धेत प्रवेश निश्चित केला.
तसेच १७ वर्षांखालील मुलांच्या ४×४०० मीटर रिले शर्यतीत सुरज भालके, भूषण साबळे, वैभव सरोदे, किरण सटवे आणि आयान शेख यांच्या संघाने तालुक्यात प्रथम क्रमांक मिळवत जिल्हास्तरीय स्पर्धेसाठी निवड मिळवली.
या यशस्वी विद्यार्थ्यांना क्रीडा शिक्षक मोबीन शेख व आकाश छडीदार यांचे मार्गदर्शन लाभले.
विद्यार्थ्यांच्या या उल्लेखनीय कामगिरीबद्दल संस्थेचे संस्थापक अध्यक्ष दादासाहेब म्हस्के, सचिव डॉ. राहुल भाऊ म्हस्के, मुख्याध्यापक रमेश मुरकुटे, पर्यवेक्षक लक्ष्मण शेवाळे तसेच शिक्षक व शिक्षकेतर कर्मचाऱ्यांनी विद्यार्थ्यांचे अभिनंदन करून जिल्हास्तरीय स्पर्धेसाठी शुभेच्छा दिल्या.
