प्रतिमापूजन व अभिवादन; रामायणातील मानवी मूल्यांवर प्रा. विकास खलसे यांचे मार्गदर्शन
अहमदपूर (प्रतिनिधी) : येथील जानकी महिला महाविद्यालयात आद्यकवी महर्षी वाल्मिकी यांची जयंती उत्साहात साजरी करण्यात आली. यानिमित्त महर्षी वाल्मिकी यांच्या प्रतिमेचे पूजन करून त्यांना अभिवादन करण्यात आले.
कार्यक्रमाच्या प्रारंभी महाविद्यालयाचे प्रभारी प्राचार्य डॉ. पिराजी वाघमारे यांनी महर्षी वाल्मिकी यांच्या प्रतिमेला पुष्पहार अर्पण करून अभिवादन केले. यावेळी महाविद्यालयातील प्राध्यापक, शिक्षकेतर कर्मचारी आणि विद्यार्थिनी मोठ्या संख्येने उपस्थित होत्या.
कार्यक्रमात प्रा. विकास खलसे यांनी महर्षी वाल्मिकी यांच्या जीवनप्रवासासह रामायण या महाकाव्याच्या निर्मितीविषयी मार्गदर्शन केले. रामायणातून मानवी मूल्ये, नैतिकता आणि आदर्श जीवनाचा संदेश मिळतो. महर्षी वाल्मिकी यांनी रामायणाच्या माध्यमातून भारतीय संस्कृती आणि साहित्यविश्वाला दिलेले योगदान अतुलनीय असल्याचे त्यांनी नमूद केले. यावेळी विद्यार्थिनींनीही महर्षी वाल्मिकी यांच्या जीवनकार्याविषयी आपले मनोगत व्यक्त केले.
कार्यक्रमाचे प्रास्ताविक प्रा. अजय स्वामी यांनी केले, तर डॉ. प्रदीप गिरी यांनी आभार मानले. पसायदानाने कार्यक्रमाची सांगता झाली.
