विद्युत तारांच्या घर्षणातून ठिणग्या पडल्याचा शेतकऱ्यांचा दावा; नुकसानग्रस्तांना आर्थिक मदत देण्याची मागणी
लामजना प्रतिनिधी | औसा : औसा तालुक्यातील सारोळा शिवारातील गट क्रमांक १९१ मध्ये विद्युत तारांच्या घर्षणातून ठिणग्या पडल्याने सुमारे दहा एकर ऊस जळून खाक झाल्याची घटना घडली. या आगीत शेतकऱ्यांचे मोठे आर्थिक नुकसान झाले असून, हाताशी आलेले पीक जळाल्याने शेतकरी हवालदिल झाले आहेत.
या घटनेत विलास ओमप्रकाश भोसले, विक्रम ओमप्रकाश भोसले, सतीश ओमप्रकाश भोसले, परमेश्वर वसंत भोसले आणि रामेश्वर वसंत भोसले यांच्या शेतातील ऊस जळून नुकसान झाले. शेतातील विहिरीजवळ असलेल्या विद्युत खांबावरील तारांचे घर्षण होऊन ठिणग्या पडल्या आणि त्यातून उसाला आग लागल्याचे संबंधित शेतकऱ्यांनी सांगितले.
आगीमध्ये उसाच्या पिकासोबतच ठिबक सिंचनाचे साहित्य, पाइप आणि शेतीची औजारेही जळून नुकसान झाले. मोठ्या मेहनतीने वाढवलेले आणि काढणीच्या जवळ आलेले ऊसपीक डोळ्यांदेखत जळून खाक झाल्याने शेतकऱ्यांना मोठा आर्थिक फटका बसला आहे.
आधीच शेतीसमोरील विविध संकटांमुळे शेतकरी अडचणीत असताना या घटनेने त्यांच्या आर्थिक विवंचनेत आणखी भर पडली आहे. त्यामुळे संबंधित विभागाने घटनास्थळी तातडीने पंचनामा करून नुकसानीचे योग्य मूल्यांकन करावे आणि नुकसानग्रस्त शेतकऱ्यांना शासनाकडून आर्थिक मदत द्यावी, अशी मागणी होत आहे.
