अपहरण प्रकरणी पाच जणांच्या आवळल्या मुसक्या
परभणी प्रतिनिधी :- रमेश मुलगीर
मानवत तालुक्यातील घटना दूध आणायला गेलेल्या तरूणाचे कारमधून अपहरण केल्याची धक्कादायक घटना गुरुवारी सकाळी मानवत तालुक्यातील लोहरा येथे घडली. मात्र, मानवत पोलिसांची समयसूचकता, तांत्रिक कौशल्य आणि चारठाणा पोलिसांच्या नाकाबंदीमुळे अवघ्या काही तासांत पाचही आरोपींच्या मुसक्या आवळण्यात पोलिसांना यश आले. अपहरणकर्त्यांच्या मारहाणीत जखमी झालेल्या तरुणाला बोरी रुग्णालयात उपचारासाठी दाखल करण्यात आले आहे.
मिळालेल्या माहितीनुसार, लोहरा येथील दत्तात्रय अमृतराव जाधव हे गुरुवारी सकाळी ६.३० ते ७ च्या सुमारास पोहंडूळ रोडवरील दूध डेअरीतून दूध आणण्यासाठी गेले होते.
यावेळी अज्ञात कारणावरून विठ्ठल भारतराव जाधव (रा. लोहरा), ओंकार बाबाराव कदम (रा. रामेटाकळी), कुलदीप निर्मळ (रा. खरबा, ता. मानवत), मोहन नानाभाऊ खिस्ते (रा. राजुरा, ता. सेलू) आणि दत्ता पांडुरंग खुडे (रा. खेर्डा, ता. पाथरी) या पाच जणांनी दत्तात्रय जाधव यांना अडवले, मारहाण केली आणि त्यांना कार (क्रमांक MH 12 WZ 6607) मध्ये बसवून पळवून नेले.
ही संपूर्ण घटना एका मुलाने पाहिली आणि त्याने तातडीने गावात जाऊन घटनेची माहिती दिली. तसेच पोलिसांना घटनेची माहिती मिळताच मानवत ठाण्याचे प्रभारी पोलीस निरीक्षक दर्शन शिंदे यांनी तत्काळ चक्रे हलवली.
जखमी तरूणावर रुग्णालयात उपचार
दरम्यान, आरोपींनी दत्तात्रय जाधव यांना मारहाण करून बोरी येथील एका खाजगी दवाखान्यात सोडून पळ काढला होता. मानवत पोलीस पथकाने चारठाणा येथून कारसह पाचही जणांना ताब्यात घेतले.
मानवत पोलीस ठाण्यात पाचही आरोपींविरुद्ध गुन्हा दाखल करण्याची प्रक्रिया सुरू असून, प्रभारी पोलीस निरीक्षक दर्शन शिंदे व त्यांच्या टीमच्या तत्परतेमुळे आरोपींना अवघ्या काही तासांत जेरबंद करण्यात पोलिसांना यश आले.
लोकेशनचा पाठलाग आणि नाकाबंदी (अशी झाली कारवाई):
१. लोकेशन ट्रेस: पोलीस निरीक्षक दर्शन शिंदे यांनी आरोपी विठ्ठल जाधव व अपहृत दत्तात्रय जाधव यांच्या मोबाईलचे लोकेशन ट्रेस केले. पो. ह. फैयाज सय्यद, उमर सय्यद, अनिस कौसडीकर आणि शक्तीराज नैताम यांना देऊन पथक लोकेशनच्या दिशेने रवाना केले.
२. पोलिसांना सतर्कता: आरोपींचे लोकेशन बोरी परिसरात दाखवत असल्याने मानवत पोलिसांचे पथक बोरीपर्यंत गेले. मात्र लोकेशन सारखे बदलत असल्याने या मार्गावरील जिंतूर पोलिसांना सतर्क करून चारठाणा येथे नाकाबंदी लावण्यात आली.
३. आरोपी ताब्यात: चारठाणा येथे पोलीस अंमलदार मुजीब शेख, प्रमोद उगले, परमेश्वर थोरे आणि आशुतोष माने यांनी संशयित कार अडवून पाचही आरोपींना ताब्यात घेतले.
