गीतामंच, लोकनृत्य आणि लघुनाटिकेत प्रथम क्रमांक; अनेक विद्यार्थिनींची तालुकास्तरीय स्पर्धेसाठी निवड
मायणी (प्रतिनिधी) : जिल्हा परिषद प्राथमिक शाळा, मायणी येथील विद्यार्थिनींनी यशवंतराव चव्हाण बाल क्रीडा स्पर्धेत विविध क्रीडा, सांस्कृतिक आणि बौद्धिक स्पर्धांमध्ये उल्लेखनीय कामगिरी करत घवघवीत यश संपादन केले आहे. गीतमंच, लोकनृत्य आणि लघुनाटिका या सांघिक स्पर्धांसह विविध वैयक्तिक स्पर्धांमध्ये विद्यार्थिनींनी यश मिळवले. या यशस्वी विद्यार्थिनींची तालुकास्तरीय स्पर्धेसाठी निवड करण्यात आली आहे.
वैयक्तिक स्पर्धांमध्ये भक्ती एकनाथ माने हिने ६०० मीटर धावण्याच्या स्पर्धेत प्रथम क्रमांक पटकावला. योगासन स्पर्धेत भक्ती माने हिने द्वितीय, तर स्वरांजली देशमुख हिने तृतीय क्रमांक मिळवला. निबंध स्पर्धेत प्रांजल कांबळे हिने प्रथम आणि अपेक्षा दगडे हिने द्वितीय क्रमांक मिळवला. वक्तृत्व स्पर्धेत प्रेरणा बागडे हिने प्रथम, माही कचरे हिने द्वितीय, तर ऋतुजा सूर्यवंशी हिने तृतीय क्रमांक पटकावला.
सांघिक गीतमंच स्पर्धेत माही कचरे, अपेक्षा दगडे, गायत्री देशमुख, आरोही मासाळ, जान्हवी मदने, ऋतुजा सूर्यवंशी, स्वराली पवार आणि स्वरांजली देशमुख या विद्यार्थिनींनी प्रथम क्रमांक मिळवला.
लोकनृत्य स्पर्धेत रिया कचरे, ईश्वरी राठोड, परी मलमे, जान्हवी मदने, स्वरांजली देशमुख, अंजली माळी, स्वरांजली फडतरे, काव्या लोखंडे, शिवन्या काळे, दर्शना हजारे, अनन्या साळुंखे, स्वरा पवार, शिवानी चव्हाण, जान्हवी शिंदे, माही कचरे, अपेक्षा दगडे आणि आरोही मासाळ या विद्यार्थिनींनी प्रथम क्रमांक पटकावला.
सांघिक लघुनाटिका स्पर्धेत अपेक्षा दगडे, माही कचरे, काव्या पोरे, स्वरांजली देशमुख, तन्वी लांडे, प्रेरणा बागडे, ऋतुजा सूर्यवंशी, श्रावणी ढवळे, सलमा मुजावर आणि माही शिंदे या विद्यार्थिनींनी प्रथम क्रमांक मिळवला. या सांघिक स्पर्धांतील यशामुळे शाळेच्या विद्यार्थिनींनी तालुकास्तरीय स्पर्धेत प्रवेश निश्चित केला आहे.
विद्यार्थिनींना शाळेच्या मुख्याध्यापिका अलका पिसाळ यांच्यासह मैथिली देशपांडे, वैशाली कांबळे, माधुरी सपाटे आणि संध्याराणी जरांगे यांनी मार्गदर्शन केले. विद्यार्थिनींच्या या यशाबद्दल गटशिक्षणाधिकारी संगीता गायकवाड, विस्ताराधिकारी सोनाली विभूते, केंद्रप्रमुख नसीमा इनामदार, शाळा व्यवस्थापन समितीचे अध्यक्ष, ग्रामस्थ आणि पालकांनी अभिनंदन करून पुढील स्पर्धांसाठी शुभेच्छा दिल्या.
