राष्ट्रवादी काँग्रेस शरदचंद्र पवार पक्षाच्या जिल्हा कार्यालयात कृतज्ञता संवाद; कार्यकर्त्यांच्या मेहनतीला विजयाचे श्रेय
सातारा, दि. ३० : पुणे विभाग पदवीधर मतदारसंघातील ऐतिहासिक विजयानंतर नवनिर्वाचित आमदार सौ. हर्षदा देशमुख-जाधव यांनी सातारा येथील राष्ट्रवादी काँग्रेस पार्टी शरदचंद्र पवार पक्षाच्या जिल्हा मध्यवर्ती कार्यालयाला सदिच्छा भेट दिली. यावेळी पक्षाच्या वतीने त्यांचा जाहीर सत्कार करण्यात आला. या भेटीदरम्यान त्यांनी पक्षाचे पदाधिकारी आणि कार्यकर्त्यांशी कृतज्ञता संवाद साधला.
यावेळी बोलताना आमदार हर्षदा देशमुख-जाधव यांनी हा विजय पक्षाचे राष्ट्रीय अध्यक्ष शरदचंद्र पवार यांच्यावरील जनतेचा अढळ विश्वास आणि तळागाळातील प्रत्येक कार्यकर्त्याने घेतलेल्या मेहनतीचा सन्मान असल्याचे सांगितले. सातारा जिल्ह्यातील सुजाण मतदारांनी दिलेला कौल आणि पक्षाच्या कार्यकर्त्यांनी अहोरात्र घेतलेले परिश्रम यामुळेच हा ऐतिहासिक विजय मिळाल्याचे त्यांनी नमूद केले.
पदवीधरांचे न्याय्य हक्क, सुशिक्षित तरुणांसाठी रोजगाराच्या संधी आणि शिक्षण क्षेत्रातील विविध आव्हाने विधिमंडळात ठामपणे मांडणार असल्याचा निर्धार त्यांनी व्यक्त केला. मतदारांनी आणि पक्षाने दाखविलेला विश्वास सार्थ ठरविण्यासाठी आपण कटिबद्ध असल्याचेही त्यांनी सांगितले.
याप्रसंगी पक्षाचे ज्येष्ठ नेते व माजी सहकार मंत्री बाळासाहेब पाटील, कराड उत्तरचे नेते देवराज पाटील (दादा), ज्येष्ठ मार्गदर्शक प्रभाकर देशमुख, मानसिंगराव जगदाळे, नरेश देसाई, विक्रमसिंह फडतरे, नितीन शिंदे, गोरखनाथ नलावडे, प्रवीण धस्के, महिला आघाडीच्या नेत्या सुवर्णाताई पाटील, अर्चनाताई पाटील यांच्यासह पक्षाचे प्रमुख पदाधिकारी, महिला कार्यकर्त्या आणि कार्यकर्ते मोठ्या संख्येने उपस्थित होते.
सत्कार स्वीकारताना आमदार हर्षदा देशमुख-जाधव यांनी पदवीधर मतदारसंघातील विविध समस्या आणि अडचणी सोडविण्यासाठी आपण प्रयत्नशील राहू, असे आश्वासन दिले. या कृतज्ञता संवादातून पदवीधरांच्या प्रश्नांना विधिमंडळात प्रभावीपणे वाचा फोडण्याचा विश्वास त्यांनी व्यक्त केला.
