सोलर पॅनेल, बोअरवेल व विहिरींच्या मोटारींचे मोठे नुकसान; रब्बी हंगामाच्या तोंडावर शेतकऱ्यांसमोर सिंचनाचा प्रश्न
जामखेड (प्रतिनिधी) : जामखेड तालुक्यातील बावी गावाच्या शिवारात अज्ञात चोरट्यांनी धुमाकूळ घालत एकाच रात्री सात शेतकऱ्यांच्या शेतातील लाखो रुपयांच्या विद्युत आणि सोलर केबल्स चोरून नेल्याची घटना उघडकीस आली आहे. या चोरीमुळे सोलर पॅनेल आणि शेतीसाठी वापरण्यात येणाऱ्या मोटारींचे मोठे नुकसान झाले असून परिसरातील शेतकरी वर्गात भीती आणि संतापाचे वातावरण निर्माण झाले आहे.
मिळालेल्या माहितीनुसार, बावी शिवारात अज्ञात चोरट्यांनी रात्रीच्या वेळी शेतात प्रवेश करून चार शेतकऱ्यांच्या सौर ऊर्जा यंत्रणेच्या मुख्य केबल्स तसेच स्टार्टरपासून विहिरीपर्यंत जोडलेल्या केबल्स कापून चोरून नेल्या. यामध्ये नाथा भाऊ देवकर, गोकुळ श्रीपती मंडलिक, सतीश भाऊसाहेब पवार आणि नितीन बाप्पा पवार यांच्या सोलर यंत्रणेचे मोठे आर्थिक नुकसान झाले आहे.
याशिवाय भास्कर श्रीपती निकम यांच्या शेतातील बोअरवेलची सुमारे ५०० फूट केबल चोरट्यांनी लंपास केली. तसेच भाऊसाहेब गुलाब चिकणे आणि प्रवीण बाळासाहेब निकम या दोन शेतकऱ्यांच्या विहिरीवरील मोटारींच्या स्टार्टरपासून थेट मोटारीपर्यंतच्या केबल्स कापून नेण्यात आल्या.
तालुक्यात शेती साहित्याच्या चोरीच्या घटनांमध्ये वाढ होत असल्याने शेतकऱ्यांची चिंता वाढली आहे. ऐन रब्बी हंगामाच्या तोंडावर विद्युत आणि सोलर केबल्स चोरीला गेल्यामुळे शेतातील पाणीपुरवठा व सिंचन व्यवस्था प्रभावित होण्याची शक्यता आहे. त्यामुळे बावी परिसरातील शेतकरी धास्तावले आहेत.
या घटनेची पोलिस प्रशासनाने तातडीने दखल घेऊन घटनास्थळी भेट द्यावी, पंचनामा करावा आणि संबंधित चोरट्यांविरुद्ध गुन्हा दाखल करून त्यांचा शोध घ्यावा, अशी एकमुखी मागणी नुकसानग्रस्त शेतकऱ्यांनी केली आहे.
