आढळगावच्या ऐश्वर्याच्या संशोधनाची २५ व्या आंतरराष्ट्रीय परिषदेसाठी निवड; टोकियो येथे जागतिक अर्थशास्त्रज्ञांसमोर मांडले संशोधन
श्रीगोंदा :
श्रीगोंदा तालुक्यातील आढळगाव येथील पंडित जवाहरलाल नेहरू विद्यालयाची माजी विद्यार्थिनी कुमारी ऐश्वर्या विठ्ठल लोणकर हिने आंतरराष्ट्रीय स्तरावर आपल्या संशोधनाचा ठसा उमटवला आहे. जपान इकॉनॉमिक्स पॉलिसी असोसिएशनच्या (JEPA) २५ व्या आंतरराष्ट्रीय परिषदेत तिच्या संशोधन पेपरची निवड झाली. टोकियो (जपान) येथे आयोजित या परिषदेत तिने जगभरातील नामांकित अर्थशास्त्रज्ञांसमोर आपल्या संशोधनाचे यशस्वी सादरीकरण केले. तिच्या या यशामुळे आढळगावसह संपूर्ण श्रीगोंदा तालुक्याच्या शिरपेचात मानाचा तुरा रोवला गेला आहे.
ऐश्वर्या लोणकर हिने आपले शालेय शिक्षण आढळगाव येथील पंडित जवाहरलाल नेहरू विद्यालयातून पूर्ण केले. त्यानंतर उच्च शिक्षणासाठी तिने पुणे येथे प्रवेश घेत सावित्रीबाई फुले पुणे विद्यापीठातून पुढील शिक्षण पूर्ण केले. सध्या ती सिम्बायोसिस स्कूल ऑफ इकॉनॉमिक्स, पुणे येथे ‘एम.एस्सी. अर्थशास्त्र – आंतरराष्ट्रीय व्यवसाय, व्यापार आणि कर कायदा’ या विषयात शिक्षण घेत आहे. याच शैक्षणिक प्रवासात तिने हे संशोधन पूर्ण केले.
जागतिक स्तरावर संशोधनाची दखल
जपानमधील टोकियो येथे आयोजित जपान इकॉनॉमिक्स पॉलिसी असोसिएशनच्या २५ व्या आंतरराष्ट्रीय परिषदेसाठी जगभरातून अनेक संशोधन प्रबंध सादर करण्यात आले होते. त्यातून ऐश्वर्याच्या संशोधन पेपरची निवड होणे ही तिच्या शैक्षणिक गुणवत्तेची महत्त्वपूर्ण दखल मानली जात आहे. परिषदेत तिने आर्थिक धोरणे आणि आंतरराष्ट्रीय व्यापाराशी संबंधित आपल्या संशोधनाचे विश्लेषणात्मक सादरीकरण केले. तिच्या मांडणीचे उपस्थित तज्ज्ञ आणि ज्येष्ठ अर्थशास्त्रज्ञांनी कौतुक केले.
ग्रामीण विद्यार्थ्यांसाठी प्रेरणादायी यश
ग्रामीण भागातील शाळेतून शिक्षणाची सुरुवात करून जपानसारख्या देशातील आंतरराष्ट्रीय परिषदेत संशोधन सादर करण्यापर्यंतचा ऐश्वर्याचा प्रवास अनेक विद्यार्थ्यांसाठी प्रेरणादायी ठरत आहे. जिद्द, मेहनत आणि योग्य मार्गदर्शनाच्या बळावर ग्रामीण भागातील विद्यार्थीही जागतिक स्तरावर आपली ओळख निर्माण करू शकतात, हे तिने आपल्या यशातून दाखवून दिले आहे.
या यशामागे तिचे आई-वडील, पंडित जवाहरलाल नेहरू विद्यालयातील शिक्षक तसेच सिम्बायोसिस स्कूल ऑफ इकॉनॉमिक्समधील प्राध्यापकांचे मोलाचे मार्गदर्शन लाभले.
ऐश्वर्याच्या या आंतरराष्ट्रीय यशाबद्दल आढळगावसह श्रीगोंदा तालुक्यातील राजकीय, सामाजिक आणि शैक्षणिक क्षेत्रातील मान्यवर तसेच ग्रामस्थांकडून तिचे अभिनंदन करण्यात येत आहे. तिच्या पुढील शैक्षणिक वाटचालीसाठी सर्व स्तरांतून शुभेच्छा व्यक्त होत आहेत.
