शिवसेना (उद्धव बाळासाहेब ठाकरे) पक्षाचे IMA ला निवेदन; शहरात रोटेशन पद्धतीने २४ तास आपत्कालीन वैद्यकीय सेवा सुरू करण्याची मागणी
हिंगणघाट प्रतिनिधी :
हिंगणघाट, दि. ५ नोव्हेंबर : शहरातील बहुतांश खासगी दवाखाने व रुग्णालये रात्री ११ वाजल्यानंतर तसेच रविवार आणि सार्वजनिक सुट्टीच्या दिवशी बंद राहत असल्याने आपत्कालीन परिस्थितीत रुग्णांना वेळेवर उपचार मिळण्यात अडचणी येत असल्याचा मुद्दा समोर आला आहे. परिणामी, गंभीर रुग्णांना उपचारांसाठी सेवाग्राम, सावंगी किंवा नागपूर येथे जावे लागत असून, उपचारासाठी होणाऱ्या विलंबामुळे रुग्णांच्या जीवाला धोका निर्माण होण्याची शक्यता असल्याची चिंता शिवसेना (उद्धव बाळासाहेब ठाकरे) पक्षाने व्यक्त केली आहे.
या समस्येकडे लक्ष वेधण्यासाठी शिवसेनेचे उपजिल्हाप्रमुख सतीश धोबे, तालुकाप्रमुख मनिष देवढे आणि शहरप्रमुख सचिन पोटदुखे यांनी इंडियन मेडिकल असोसिएशन (IMA), हिंगणघाटच्या अध्यक्षांना निवेदन दिले.
निवेदनात म्हटले आहे की, अपघात, हृदयविकाराचा झटका, लहान मुलांना अचानक उद्भवणारा ताप, महिलांची प्रसूती अशा आपत्कालीन प्रसंगी रुग्णांना तातडीने वैद्यकीय उपचारांची गरज असते. मात्र, रात्रीच्या वेळी किंवा सुट्टीच्या दिवशी डॉक्टर उपलब्ध नसल्यास रुग्ण व त्यांच्या नातेवाइकांची मोठी गैरसोय होते. विशेषतः ग्रामीण भागातून उपचारासाठी हिंगणघाट शहरात येणाऱ्या नागरिकांना या समस्येचा अधिक सामना करावा लागतो. वेळेवर उपचार न मिळाल्यास गंभीर परिणाम होण्याची भीतीही निवेदनातून व्यक्त करण्यात आली आहे.
डॉक्टरांच्या वैयक्तिक सुट्ट्यांना आपला विरोध नसून, नागरिकांच्या आरोग्याच्या दृष्टीने शहरात किमान रोटेशन पद्धतीने २४ तास आपत्कालीन वैद्यकीय सेवा उपलब्ध असावी, अशी भूमिका शिवसेनेने मांडली आहे. डॉक्टरांना समाजात देवासमान मानले जाते; त्यामुळे माणुसकीच्या नात्याने या समस्येकडे लक्ष देऊन नागरिकांना दिलासा द्यावा, असे आवाहनही करण्यात आले आहे.
शिवसेनेच्या तीन प्रमुख मागण्या
१. रात्रीच्या वेळी व सुट्टीच्या दिवशी IMA च्या माध्यमातून ऑन-कॉल ड्युटीवरील डॉक्टरांचे रोटेशन जाहीर करावे.
२. आपत्कालीन सेवा देणाऱ्या रुग्णालयांची यादी आणि संपर्क क्रमांक नागरिकांना सहज उपलब्ध होतील अशा सार्वजनिक ठिकाणी लावावेत.
३. या प्रश्नावर IMA आणि प्रशासनाने संयुक्त बैठक घेऊन कायमस्वरूपी तोडगा काढावा.
या निवेदनाच्या प्रती जिल्हाधिकारी, वर्धा, जिल्हा शल्यचिकित्सक, वर्धा तसेच वैद्यकीय अधीक्षक, हिंगणघाट यांना माहितीस्तव देण्यात आल्या आहेत. निवेदनाची तातडीने दखल घेऊन योग्य कार्यवाही करावी, अशी मागणी शिवसेनेच्या वतीने करण्यात आली आहे.
यावेळी शितल चौधरी, शंकर मोहमारे, भास्कर ठवरे, हिरामण आवारी, प्रमोद एडलेवार, अनंता गलांडे, अमोल वादाफळे, गुणवंतजी वानखेडे, अविनाश धोटे, नितीन वैद्य, सुभाष काटकर, विलास चौधरी, किशोर इंगोले, पप्पू घवघवे, रफिक शेख, जुबेर शेख, गुड्डू डहाके, अशोक बावणे आदी उपस्थित होते.
