दीपावलीनिमित्त विद्यार्थ्यांना पारंपरिक उटणे तयार करण्याचा अनुभव; नैसर्गिक घटकांची ओळख करून देणारा उपक्रम
पाटगाव :
दीपावलीनिमित्त तांबाळेश्वर हायस्कूल, तांबाळे येथे नैसर्गिक सुगंधी उटणे निर्मिती कार्यशाळेचे आयोजन करण्यात आले होते. या अभिनव उपक्रमाला शाळेतील विद्यार्थी व विद्यार्थिनींकडून उत्स्फूर्त प्रतिसाद मिळाला.
या कार्यशाळेत विद्यार्थ्यांनी स्वतः सुगंधी उटणे तयार करण्याचा अनुभव घेतला. त्याचबरोबर निसर्गाच्या सान्निध्यात उपलब्ध असलेल्या सुगंधी वनस्पती आणि विविध नैसर्गिक घटकांची माहितीही जाणून घेतली. चंदन पावडर, वाळा पावडर, संत्र्याची पावडर, मुलतानी माती, अमानमूळ, गुलाब पावडर आणि बावची पावडर अशा विविध घटकांचा वापर करून विद्यार्थ्यांनी सुगंधी उटणे तयार केले.
बाजारात उपलब्ध असलेल्या तयार उत्पादनांऐवजी नैसर्गिक घटकांचा वापर करून पारंपरिक पद्धतीने उटणे तयार करण्याचा प्रत्यक्ष अनुभव विद्यार्थ्यांना या कार्यशाळेतून मिळाला. या उपक्रमामुळे विद्यार्थ्यांमध्ये निसर्गाविषयी जागरूकता, सर्जनशीलता आणि कृतीशील शिक्षणाला प्रोत्साहन मिळाले. तसेच आपल्या पारंपरिक संस्कृतीची ओळख आणि तिच्याविषयी अभिमान निर्माण करण्याचा प्रयत्न करण्यात आला.
या कार्यशाळेसाठी विजय देसाई यांनी सुगंधी उटणे तयार करण्यासाठी आवश्यक साहित्य उपलब्ध करून देत मोलाचे सहकार्य केले.
यावेळी शाळेचे मुख्याध्यापक संतोष भोसले, प्रकाश सांडूगडे, उत्तम घोगरे, प्रवीण पाटील, विजय आदित्य यांच्यासह शिक्षक व शिक्षकेतर कर्मचारी उपस्थित होते.
