वडूज-दहिवडी रस्त्यावरील कॅनॉल परिसरात जुने मीटर उघड्यावर; स्मार्ट मीटर सक्तीने बसविल्याचा आरोप, अन्यथा महावितरण कार्यालयावर मोर्चाचा इशारा
खटाव प्रतिनिधी :
खटाव : स्मार्ट मीटर बसविण्याच्या प्रक्रियेवरून खटाव तालुक्यात ग्राहकांमध्ये नाराजी वाढत असून, विविध संस्था व सामाजिक संघटनांचा विरोध असतानाही स्मार्ट मीटर बसविण्याचे काम सुरू असल्याचा आरोप करण्यात येत आहे. वडूज-दहिवडी मार्गावरील कॅनॉलजवळ बदलण्यात आलेले जुने मीटर मोठ्या प्रमाणात उघड्यावर फेकून दिल्याचे चित्र समोर आले आहे. त्यामुळे महावितरणाच्या कारभारावर ग्राहकांकडून प्रश्न उपस्थित केले जात आहेत.
स्मार्ट मीटर बसविण्याच्या प्रक्रियेदरम्यान दंडाची भीती दाखवून तसेच दमदाटी करून ग्राहकांवर दबाव आणला जात असल्याचा आरोप काही ग्राहक व सामाजिक संघटनांनी केला आहे. ज्या कंपनीला स्मार्ट मीटर बसविण्याचे काम देण्यात आले आहे, त्या कंपनीचे अधिकारी तक्रारींकडे टाळाटाळ करीत असल्याचेही सांगण्यात येत आहे. याबाबत राजकीय पक्ष आणि सामाजिक संघटनांनी वेळोवेळी निवेदने देऊन आंदोलने केली; मात्र त्यानंतरही मीटर बदलण्याची प्रक्रिया सुरूच असल्याचा दावा करण्यात येत आहे.
एकीकडे तालुक्यातील नागरिक दुष्काळी परिस्थितीचा सामना करीत असताना, सुस्थितीत असलेले जुने मीटर बदलून स्मार्ट मीटर बसविण्याची घाई का केली जात आहे, असा सवाल ग्राहकांकडून उपस्थित केला जात आहे. स्मार्ट मीटर बसविल्यानंतर वीजबिले मोठ्या प्रमाणात वाढून येत असल्याच्या तक्रारीही ग्राहकांनी केल्या आहेत. वारंवार निवेदने व तक्रारी करूनही संबंधित अधिकारी दखल घेत नसल्याचा आरोप करण्यात आला आहे.
जुने मीटर बदलण्याची जबाबदारी असलेल्या संबंधित अधिकारी व कंपनीच्या कर्मचाऱ्यांच्या कामकाजाची चौकशी करून, जुने मीटर उघड्यावर टाकण्यास जबाबदार असणाऱ्यांवर कठोर कारवाई करावी, अशी मागणी ग्राहक व सामाजिक संघटनांकडून करण्यात येत आहे.
या मागण्यांची तातडीने दखल न घेतल्यास वडूज येथील महावितरण महामंडळाच्या कार्यालयावर भव्य मोर्चा काढून आंदोलन करण्यात येईल, असा इशारा ग्राहक व सामाजिक संघटनांच्या वतीने देण्यात आला आहे.
