वनविभागाच्या सतर्कतेला यश; शहापूरमध्ये मादी बिबट्या आणि तिच्या दोन पिल्लांची सुखरूप भेट, कोरेगाव वनविभागाची कौतुकास्पद कामगिरी
पिंपोडे :
ऊसाच्या शेतात आढळलेली अवघ्या दहा ते बारा दिवसांची बिबट्याची दोन पिल्ले… आईपासून दुरावल्याने त्यांच्या सुरक्षिततेचा निर्माण झालेला प्रश्न… आणि त्याच परिसरात पिल्लांच्या शोधात भटकणारी बिबट्याची मादी! अशा परिस्थितीत वनविभागाने दाखवलेली सतर्कता, संयम आणि नियोजनबद्ध प्रयत्न अखेर यशस्वी ठरले. शहापूर (ता. कोरेगाव) येथे मादी बिबट्या आणि तिच्या दोन पिल्लांची सुखरूप भेट घडवून आणण्यात वनविभागाला यश आले. या कामगिरीचे परिसरातून कौतुक होत आहे.
शहापूर येथील शेतकरी पुरुषोत्तम मारुती माने यांच्या ‘काळाकडा’ नावाच्या शिवारातील उसाच्या शेतात तीन दिवसांपूर्वी ऊसतोड सुरू असताना दाट पाचटामध्ये अवघ्या दहा ते बारा दिवसांची बिबट्याची दोन पिल्ले आढळून आली. अचानक पिल्ले दिसल्याने ऊसतोड कामगारांमध्ये काही काळ भीतीचे वातावरण निर्माण झाले. मात्र, पिल्ले अत्यंत लहान असल्याने त्यांना त्यांच्या आईपासून वेगळे करणे धोकादायक ठरू शकते, याची जाणीव वनविभागाला होती.
घटनेची माहिती मिळताच वनविभागाचे अधिकारी आणि कर्मचारी घटनास्थळी दाखल झाले. परिसराची पाहणी करून मादी बिबट्या पुन्हा पिल्लांच्या शोधात येण्याची शक्यता लक्षात घेण्यात आली. त्यानुसार संबंधित परिसरात पाळत ठेवण्यात आली. दरम्यान, मादी बिबट्या पिल्लांच्या शोधात घटनास्थळी आली होती; मात्र काही कारणास्तव तिने पिल्लांना सोबत नेले नाही. त्यामुळे वनविभागाने आवश्यक खबरदारी घेत दोन्ही पिल्लांना सुरक्षितपणे ताब्यात घेतले.
दरम्यान, वनविभागाने लावलेल्या पिंजऱ्यात रविवारी रात्री मादी बिबट्या अडकली. त्यानंतर वनविभागाच्या अधिकारी-कर्मचाऱ्यांनी स्थानिक पदाधिकारी, शेतकरी, ऊसतोडणी मुकादम आणि ऊसतोड कामगारांच्या सहकार्याने मादी बिबट्या व तिच्या दोन्ही पिल्लांना सुरक्षितपणे ताब्यात घेतले. नियोजनबद्ध पद्धतीने राबविण्यात आलेल्या या मोहिमेमुळे पिल्ले आणि मादी यांची पुन्हा भेट घडवून आणण्याचा मार्ग मोकळा झाला.
या संपूर्ण मोहिमेत कोरेगाव वनविभागाने दाखवलेली तत्परता, संयम आणि सतर्कता तसेच स्थानिक नागरिकांनी दिलेले सहकार्य महत्त्वपूर्ण ठरले. आईपासून दुरावलेल्या दोन चिमुकल्या पिल्लांना पुन्हा मायेची ऊब मिळाल्याने नागरिकांमध्ये समाधान व्यक्त होत आहे. वन्यजीवांचे संरक्षण करताना मानवी संवेदनशीलता आणि वनविभागाचे योग्य नियोजन किती महत्त्वाचे असते, याचे उत्तम उदाहरण या घटनेतून समोर आले आहे.
