युवा फ्रेंड्स सर्कल फाऊंडेशनचा स्तुत्य उपक्रम; महिला व ग्रामस्थांनी श्रमदानातून दिला एकीचा आणि स्वच्छतेचा संदेश
पत्रकार : पेण
पेण : “स्वच्छतेकडून समृद्धीकडे… एक पाऊल” हा संदेश प्रत्यक्ष कृतीत उतरवत युवा फ्रेंड्स सर्कल फाऊंडेशनच्या वतीने वडमाळवाडी येथे रस्त्याची डागडुजी आणि स्वच्छता अभियान मोठ्या उत्साहात राबविण्यात आले. महाराष्ट्र भूषण पुरस्कारप्राप्त सामाजिक कार्यकर्ते व पत्रकार कैलासराजे घरत यांच्या मार्गदर्शनाखाली हा उपक्रम पार पडला. या अभियानात वडमाळवाडीतील महिला भगिनी आणि ग्रामस्थांनी उत्स्फूर्त सहभाग नोंदविला.
शाळेकडे जाणाऱ्या रस्त्याची डागडुजी
पावसाळ्यात वडमाळवाडी येथील जिल्हा परिषद शाळेकडे जाणारा रस्ता खचल्यामुळे मार्गावर मोठा खड्डा निर्माण झाला होता. त्यामुळे विद्यार्थ्यांना शाळेत ये-जा करताना तसेच वाहनचालकांना वाहतूक करताना अडचणींचा सामना करावा लागत होता. ही समस्या लक्षात घेऊन युवा फ्रेंड्स सर्कल फाऊंडेशनचे संस्थापक अध्यक्ष तथा पुरोगामी पत्रकार संघाचे रायगड जिल्हा संपर्कप्रमुख कैलासराजे घरत यांच्या मार्गदर्शनाखाली ग्रामस्थांच्या सहकार्याने खड्ड्यात माती टाकून रस्त्याची डागडुजी करण्यात आली.
विहिरीकडे जाणारा रस्ता श्रमदानातून स्वच्छ
वडमाळवाडीतील विहिरीकडे जाणारा रस्ता पालापाचोळा, रानटी वेली, झाडे-झुडपे आणि कचऱ्याने व्यापला होता. या मार्गाने पाणी आणण्यासाठी तसेच कपडे व भांडी धुण्यासाठी जाणाऱ्या महिलांना मोठ्या अडचणींचा सामना करावा लागत होता. ही समस्या दूर करण्यासाठी फाऊंडेशनच्या पुढाकाराने पत्रकार कैलासराजे घरत यांच्या मार्गदर्शनाखाली गावातील महिला भगिनी एकत्र आल्या आणि त्यांनी श्रमदानातून विहिरीकडे जाणाऱ्या रस्त्याची साफसफाई केली. स्वच्छतेमुळे संपूर्ण परिसर मोकळा व प्रसन्न झाला.
महिला व ग्रामस्थांचा उत्स्फूर्त सहभाग
या उपक्रमात सौ. नर्मदा वाघे, सौ. चंद्रभागा पवार, गुलाब वाघे, रंजना वाघे, यमुना वाघे, बळीराम वाघे, तुळशीदास वाघे, मच्छिंद्र वाघे, मंगलीबाई वाघे, जागृती वाघे, कविता वाघे, आयतीबाई वाघे, मनीषा वाघे, पोशीबाई वाघे, रेश्मा हिलम, जानकीबाई वाघे, सविता वाघे, दामिनी वाघे, सरिता वाघे, मालू सवार, संगीता वाघे, सुविधा वाघे, शर्मिला वाघे, अस्मिता वाघे, रविता वाघे आदी महिला व ग्रामस्थांनी मोलाचे सहकार्य केले.
सर्वांनी एकत्र येऊन श्रमदान केल्यास गावाच्या विकासासाठी कोणतेही काम सहज शक्य होते, याचा प्रत्यय या अभियानातून आला. ग्रामस्थांच्या एकजुटीने स्वच्छता आणि सामाजिक बांधिलकीचा आदर्श निर्माण केला.
आदिवासी बांधवांच्या सामाजिक व शैक्षणिक विकासासाठी सातत्यपूर्ण योगदान
पत्रकार व सामाजिक कार्यकर्ते कैलासराजे घरत हे आदिवासी समाजाच्या सामाजिक, शैक्षणिक आणि सर्वांगीण विकासासाठी सातत्याने विविध उपक्रम राबवित असतात. बालविवाह प्रतिबंधक जनजागृती, नशामुक्ती व व्यसनमुक्ती अभियान, विद्यार्थ्यांना शैक्षणिक साहित्य वाटप, वनराई बंधारे अशा विविध समाजोपयोगी उपक्रमांच्या माध्यमातून ते आदिवासी वाडी-वस्त्यांमध्ये कार्यरत आहेत. वडमाळवाडीतील रस्त्याची डागडुजी आणि स्वच्छता अभियान हा त्याच सामाजिक कार्याचा एक भाग आहे.
या स्तुत्य उपक्रमाबद्दल वडमाळवाडी ग्रामस्थांकडून युवा फ्रेंड्स सर्कल फाऊंडेशन आणि पत्रकार कैलासराजे घरत यांचे कौतुक करण्यात येत आहे. ग्रामविकासासाठी प्रशासनासोबतच नागरिकांचा सहभाग आणि सामूहिक श्रमदान किती महत्त्वाचे आहे, हे या उपक्रमाने अधोरेखित केले.
