अपुऱ्या कामांमुळे अपघात व वाहतूक कोंडीचा प्रश्न गंभीर; संजय आनंदकर यांचा सार्वजनिक बांधकाम विभागाला आंदोलनाचा इशारा
श्रीगोंदा प्रतिनिधी :
श्रीगोंदा-मांडवगण रस्त्याचे काम अत्यंत संथ गतीने सुरू असून, अपूर्ण कामांमुळे या मार्गावर वारंवार अपघात आणि वाहतूक कोंडी होत आहे. या समस्येकडे प्रशासनाने तातडीने लक्ष देऊन कामाला गती द्यावी, अन्यथा सोमवार, दि. १६ नोव्हेंबर २०२६ रोजी श्रीगोंदा तहसील कार्यालयासमोर तीव्र स्वरूपाचे ठिय्या आंदोलन करण्यात येईल, असा इशारा राष्ट्रवादी काँग्रेसचे माजी तालुकाध्यक्ष संजय आनंदकर यांनी सार्वजनिक बांधकाम विभागाला दिला आहे.
यासंदर्भात सार्वजनिक बांधकाम उपविभागाच्या उपविभागीय अभियंत्यांना निवेदन देण्यात आले असून, त्यामध्ये रस्त्याच्या दुरवस्थेमुळे नागरिकांना भेडसावणाऱ्या समस्यांकडे लक्ष वेधण्यात आले आहे. रस्त्याच्या एका बाजूचे सिमेंट काँक्रीटचे काम पूर्ण झाले असले, तरी साईडपट्ट्यांचे काम अद्याप अपूर्ण आहे. त्यामुळे रस्त्याचा अंदाज न आल्याने विशेषतः रात्रीच्या वेळी तसेच नवीन वाहनचालकांचे अपघात होत असल्याचे निवेदनात नमूद करण्यात आले आहे. दुसऱ्या बाजूला वाहतुकीसाठी अत्यंत अरुंद जागा शिल्लक असल्याने समोरून येणाऱ्या वाहनांना मार्ग काढताना अडचणी निर्माण होतात. परिणामी, या मार्गावर वारंवार वाहतूक कोंडी होत आहे.
दुचाकीस्वारांच्या सुरक्षिततेचा प्रश्न ऐरणीवर; धुळीमुळे नागरिक त्रस्त
रस्त्यावर सर्वत्र खडी आणि छोटे दगड पसरलेले असल्याने दुचाकी घसरून अपघात होण्याचा धोका वाढला आहे. त्याचबरोबर रस्त्यावरून उडणाऱ्या धुळीमुळे वाहनचालकांना समोरील रस्ता स्पष्ट दिसत नाही. रस्त्यालगत राहणारे नागरिक, पादचारी आणि प्रवाशांनाही धुळीचा मोठा त्रास सहन करावा लागत असून, त्यांच्या आरोग्याचा प्रश्न निर्माण झाला आहे.
३ ऑगस्टच्या निवेदनानंतरही कामाची गती संथच
यापूर्वी ३ ऑगस्ट २०२६ रोजी रस्त्याचे बंद पडलेले काम पुन्हा सुरू करण्यासाठी निवेदन देण्यात आले होते. त्यानंतर काम सुरू झाले, ही समाधानाची बाब असली तरी प्रत्यक्षात कामाचा वेग अत्यंत संथ असल्याने नागरिकांच्या अडचणी कायम आहेत. शेतकरी, व्यावसायिक, विद्यार्थी तसेच सर्वसामान्य नागरिकांना दररोज या अपूर्ण रस्त्यामुळे नाहक मनस्ताप सहन करावा लागत आहे.
प्रशासनाने या सर्व समस्यांची गांभीर्याने दखल घेऊन रस्त्याचे अपूर्ण काम तातडीने पूर्ण करावे, साईडपट्ट्यांची कामे मार्गी लावावीत आणि वाहतुकीसाठी सुरक्षित व्यवस्था करावी, अशी मागणी निवेदनातून करण्यात आली आहे. अन्यथा सोमवार, दि. १६ नोव्हेंबर २०२६ रोजी सकाळी ११ वाजता ज्येष्ठ नेते घनःश्याम अण्णा शेलार आणि जिल्हा परिषद सदस्य सचिनभाऊ जगताप यांच्या नेतृत्वाखाली श्रीगोंदा तहसील कार्यालयासमोर ठिय्या आंदोलन करण्यात येईल, असा स्पष्ट इशारा संजय आनंदकर यांनी दिला आहे.
