राज्यस्तरीय कुस्ती स्पर्धेत सुवर्णपदक; ऑल इंडिया युनिव्हर्सिटी नॅशनल स्पर्धेसाठी महाराष्ट्रातून निवड
पारनेर (प्रतिनिधी) : पारनेर तालुक्यातील शिरापूर गावचा सुपुत्र पैलवान निलेश उचाळे याने राज्यस्तरीय कुस्ती स्पर्धेत दमदार कामगिरी करत सुवर्णपदक पटकावले आहे. त्याच्या या उल्लेखनीय यशामुळे शिरापूर गावासह संपूर्ण पारनेर तालुक्याच्या शिरपेचात मानाचा तुरा रोवला गेला आहे.
निलेश उचाळे याची चंदीगड येथे होणाऱ्या ऑल इंडिया युनिव्हर्सिटी नॅशनल कुस्ती स्पर्धेसाठी महाराष्ट्राच्या संघातून निवड झाली आहे. राज्यस्तरीय स्पर्धेत उत्कृष्ट कामगिरी करत त्याने आपल्या कुस्ती कौशल्याची छाप उमटवली असून राष्ट्रीय स्तरावरही चमकदार कामगिरी करण्याची संधी त्याला मिळाली आहे.
निलेशच्या या यशामागे त्याला मार्गदर्शन करणारे प्रशिक्षक, कुटुंबीय तसेच कुस्ती क्षेत्रातील मार्गदर्शकांचे मोलाचे योगदान आहे. त्याच्या यशाबद्दल सीताबाई कला व विज्ञान विद्यालय, धारगाव आणि पारनेर तालुका कुस्ती संघटनेच्या वतीने अभिनंदन करण्यात येत आहे.
ग्रामीण भागातील प्रतिकूल परिस्थितीवर मात करत कुस्ती क्षेत्रात यश संपादन करणाऱ्या निलेशने परिसरातील युवा खेळाडूंसमोर प्रेरणादायी आदर्श निर्माण केला आहे. त्याच्या या यशामुळे परिसरातून आनंद व्यक्त होत असून आगामी राष्ट्रीय स्पर्धेसाठी त्याला शुभेच्छा दिल्या जात आहेत.
