महाराष्ट्र जीवन प्राधिकरणाच्या अंबरनाथ कार्यालयाला तातडीच्या कार्यवाहीचे आदेश; हजारो लिटर पिण्याचे पाणी वाया जात असल्याचा प्रकार
कल्याण | प्रतिनिधी :
बदलापूर शहरातील विविध भागांत महाराष्ट्र जीवन प्राधिकरणाच्या (मजिप्रा) जलवाहिन्यांना गळती लागून दररोज हजारो लिटर पिण्याचे पाणी वाया जात असल्याच्या तक्रारीची अखेर वरिष्ठ स्तरावर गंभीर दखल घेण्यात आली आहे. या प्रकरणी ठाणे येथील महाराष्ट्र जीवन प्राधिकरण विभागाने अंबरनाथ येथील कार्यकारी अभियंता कार्यालयाला पुढील आवश्यक कार्यवाही करण्याचे निर्देश दिले आहेत. त्यामुळे आता प्रत्यक्षात पाणीगळती रोखण्यासाठी कोणती पावले उचलली जातात, याकडे नागरिकांचे लक्ष लागले आहे.
शहरातील विविध भागांत जलवाहिन्यांना गळती
बदलापूर शहरातील प्रभाग क्रमांक २ मधील सोनिवली येथील डॉ. बाबासाहेब आंबेडकर स्मारकासमोर, म्हाडा वसाहतीच्या गेटसमोर तसेच यादव नगर परिसरात महाराष्ट्र जीवन प्राधिकरणाच्या जलवाहिन्या वारंवार फुटत असल्याने मोठ्या प्रमाणात पिण्याच्या पाण्याची नासाडी होत आहे.
या गंभीर समस्येबाबत संबंधित विभागाच्या अधिकाऱ्यांना वारंवार माहिती देऊनही ठोस आणि कायमस्वरूपी उपाययोजना करण्यात येत नसल्याचा आरोप करण्यात आला आहे. एकीकडे नागरिकांना पाण्याच्या समस्यांना सामोरे जावे लागत असताना दुसरीकडे हजारो लिटर पाणी वाया जात असल्याने नागरिकांमध्ये नाराजी व्यक्त होत आहे.
१० नोव्हेंबरला ई-मेलद्वारे अधिकृत तक्रार
संबंधित अधिकाऱ्यांच्या कथित निष्क्रियतेविरोधात दैनिक ‘चालू वार्ता’चे ठाणे जिल्हा ग्रामीण प्रतिनिधी तथा कल्याण तालुका भ्रष्टाचार विरोधी समितीचे अध्यक्ष विकी कुंडलिक जाधव यांनी १० नोव्हेंबर २०२६ रोजी ई-मेलद्वारे अधिकृत तक्रार दाखल केली होती.
या तक्रारीमध्ये पाणीगळतीच्या समस्येची सखोल चौकशी करावी, संबंधित जबाबदार अधिकाऱ्यांची भूमिका तपासावी आणि दोषी आढळणाऱ्यांवर नियमानुसार कारवाई करावी, अशी मागणी करण्यात आली होती.
अंबरनाथ कार्यालयाकडे तक्रार वर्ग
या तक्रारीची दखल घेत महाराष्ट्र जीवन प्राधिकरण, ठाणे विभागाचे कार्यकारी अभियंता गजानन दानवे यांनी १२ नोव्हेंबर २०२६ रोजी अधिकृत पत्र जारी केले आहे.
सदर तक्रार अंबरनाथ उपविभागाशी संबंधित असल्याचे नमूद करून मूळ तक्रार अर्ज पुढील योग्य त्या कार्यवाहीसाठी अंबरनाथ येथील कार्यकारी अभियंता (म.जी.प्रा. जलव्यवस्थापन विभाग) यांच्या कार्यालयाकडे वर्ग करण्यात आला आहे. या पत्राची प्रत माहितीसाठी ठाणे येथील मुख्य अभियंता आणि अधीक्षक अभियंता यांनाही पाठविण्यात आली आहे.
जबाबदार अधिकाऱ्यांवर कारवाई होणार का?
प्रशासकीय स्तरावर तक्रारीची दखल घेऊन पत्रव्यवहार सुरू झाला असला, तरी प्रत्यक्षात जलवाहिन्यांची दुरुस्ती कधी होणार, पाणीगळती रोखण्यासाठी कायमस्वरूपी उपाययोजना केव्हा केल्या जाणार आणि याप्रकरणी जबाबदार अधिकाऱ्यांवर कारवाई होणार का, असे सवाल स्थानिक नागरिकांकडून उपस्थित केले जात आहेत.
पिण्याचे पाणी ही अत्यंत मौल्यवान नैसर्गिक संपत्ती असून त्याची अशा प्रकारे होणारी नासाडी थांबविणे आवश्यक आहे. त्यामुळे संबंधित विभागाने केवळ कागदोपत्री कार्यवाही न करता प्रत्यक्ष घटनास्थळी पाहणी करून जलवाहिन्यांची तातडीने दुरुस्ती करावी, अशी मागणी नागरिकांकडून होत आहे.
