शेतकऱ्यांना एकरी ५ हजार १ रुपयांचा हमीभाव देण्याची मागणी; ऊसासह इतर पिकांच्या हमीभावासाठीही एकजुटीने लढण्याचे आवाहन
पाथर्डी | प्रतिनिधी
ऊस पिकाचा जुना दर रद्द करून शेतकऱ्यांना योग्य भाववाढ मिळावी, यासाठी शेतकऱ्यांनी आपल्या मुलाबाळांच्या भविष्यासाठी आणि आर्थिक हितासाठी वेळ देऊन आंदोलनात सहभागी व्हावे, असे आवाहन चितळी ग्रामपंचायतीचे सरपंच तथा उद्योजक अशोक आमटे यांनी केले आहे.
राज्य व केंद्र सरकारने देशातील सर्व खासगी आणि सहकारी साखर कारखान्यांना उसाच्या दरासाठी सबसिडी द्यावी, तसेच ऊस उत्पादक शेतकऱ्यांना किमान एकरी ५ हजार १ रुपयांचा हमीभाव जाहीर करावा, अशी मागणी आमटे यांनी केली आहे. शेतकऱ्यांना न्याय मिळवून देण्यासाठी सर्व ऊस उत्पादक आणि शेतकरी हितचिंतकांनी शेतकरी संघटना व समविचारी नेतृत्वाच्या आवाहनाला प्रतिसाद देत आंदोलनात सहभागी व्हावे, असेही त्यांनी म्हटले आहे.
ऊसदरवाढीच्या मागणीसाठी होणाऱ्या आंदोलनात सर्वपक्षीय नेते आणि त्यांच्या कार्यकर्त्यांनीही सहभागी होऊन शेतकऱ्यांना पाठिंबा द्यावा, असे आवाहन आमटे यांनी केले. योग्य मागणीसाठी आंदोलन करणाऱ्या शेतकऱ्यांच्या पाठीशी सर्वांनी खंबीरपणे उभे राहण्याची गरज असल्याचे त्यांनी सांगितले.
ऊस पिकानंतर इतर शेतमालालाही हमीभाव मिळावा, यासाठी शेतकऱ्यांनी एकत्र येऊन लवकरच आंदोलन उभारावे, अशी भूमिकाही त्यांनी मांडली. शेतकरी एकजुटीने रस्त्यावर उतरून आपल्या मागण्या मांडतील, तर राज्य सरकार केंद्र सरकारकडे शेतकऱ्यांच्या मागण्यांसाठी पाठपुरावा करेल आणि साखर कारखान्यांना विशेष सबसिडी देण्याबाबत विनंती करेल, असा विश्वास त्यांनी व्यक्त केला.
केंद्र सरकारने पेट्रोलप्रमाणे उसालाही सबसिडी द्यावी आणि साखरेचे दर नियंत्रणात ठेवावेत, अशी मागणी आमटे यांनी केली. यामुळे ऊस उत्पादक शेतकऱ्यांसह साखर वापरणाऱ्या गरीब ग्राहकांनाही दिलासा मिळू शकतो, असे त्यांनी नमूद केले.
ऊसदरवाढीसाठीच्या या आंदोलनात शेतकऱ्यांनी मोठ्या संख्येने सहभागी होऊन आपले योगदान द्यावे, असे आवाहन अशोकदादा आमटे यांनी केले आहे.
