साडेसात एकरांहून अधिक जागा आरक्षित; बस आगाराअभावी प्रवाशांची गैरसोय, बस चार्जिंग सेंटरही अद्याप सुरू नाही
केज | प्रतिनिधी
बीड जिल्ह्यातील सर्वात जुन्या तालुक्यांपैकी एक असलेल्या केज शहरात बस आगार सुरू करण्यास मंजुरी द्यावी, अशी मागणी केज विकास संघर्ष समितीच्या वतीने परिवहन मंत्री प्रताप सरनाईक यांच्याकडे निवेदनाद्वारे करण्यात आली आहे.
केज शहर हे खामगाव-पंढरपूर आणि अहमदपूर-अहिल्यानगर या दोन राष्ट्रीय महामार्गांच्या जोडणीवर वसलेले आहे. त्यामुळे येथून दररोज हजारो प्रवासी महाराष्ट्राच्या विविध भागांत ये-जा करतात. प्रवाशांची वाढती संख्या आणि वाहतुकीची गरज लक्षात घेता केज येथे स्वतंत्र बस आगार असणे आवश्यक असल्याचे समितीने निवेदनात नमूद केले आहे.
केज-बीड महामार्गालगत बस आगारासाठी साडेसात एकरांहून अधिक जागा आरक्षित करण्यात आली आहे. मात्र, ही जागा अद्याप वापराविना पडून असून, परिसरात अतिक्रमण होण्याची शक्यता निर्माण झाली आहे. या जागेवर तातडीने बस आगार स्थापन करून ते कार्यान्वित करावे, अशी मागणी समिती गेल्या अनेक वर्षांपासून करीत आहे.
सध्याचे धारूर बस आगार केजमधील प्रवाशांसाठी सोयीचे ठरत नाही. केज येथून सुटणाऱ्या बसगाड्यांना धारूरपर्यंत सुमारे १५ किलोमीटरचा प्रवास करावा लागतो. प्रवासी संख्येचा विचार करता हा प्रवास आर्थिकदृष्ट्याही परवडणारा नसल्याचे समितीने म्हटले आहे. त्यामुळे केज येथे स्वतंत्र बस आगार मंजूर करावे, अशी मागणी करण्यात आली आहे.
केज येथे बस चार्जिंग सेंटर सुरू करण्यासाठी सुमारे एक वर्षापूर्वी शासनाकडून मंजुरी मिळाली आहे. केज विधानसभा मतदारसंघाच्या आमदार नमिता मुंदडा आणि केज विकास संघर्ष समितीने यासाठी शासनदरबारी प्रयत्न केले होते. मात्र, मंजुरी मिळून एक वर्ष उलटूनही हे चार्जिंग सेंटर अद्याप सुरू झालेले नाही.
हे चार्जिंग सेंटर लवकरात लवकर सुरू करावे, अशी मागणीही परिवहन मंत्री प्रताप सरनाईक यांच्याकडे करण्यात आली आहे, अशी माहिती प्रा. हनुमंत भोसले यांनी प्रतिनिधीशी बोलताना दिली.
या निवेदनावर प्रा. हनुमंत भोसले, रामहरी कोल्हे, नासेर मुंडे आणि शेषराव घोरपडे यांच्या स्वाक्षऱ्या आहेत.
