जुन्या आठवणींना उजाळा; गुरुजन आणि मित्र-मैत्रिणींच्या भेटीने शाळेचा परिसर झाला आनंदमय
सुरेगाव (गंगा) | प्रतिनिधी | दि. १४ नोव्हेंबर २०२६
नेवासा तालुक्यातील सुरेगाव (गंगा) येथील जिल्हा परिषद प्राथमिक शाळेत सन २०११-२०१२ मधील माजी विद्यार्थ्यांचे स्नेहसंमेलन मोठ्या उत्साहात आणि आनंदमय वातावरणात पार पडले. अनेक वर्षांनंतर शाळेतील जुने मित्र-मैत्रिणी आणि गुरुजन एकत्र आल्याने शाळेचा परिसर आनंदाने फुलून गेला होता.
या कार्यक्रमाला भगत मॅडम आणि गायकवाड मॅडम प्रमुख पाहुण्या म्हणून उपस्थित होत्या. कार्यक्रमाचे सूत्रसंचालन दिलीप शिंदे आणि हिना भोसले यांनी केले.
स्नेहसंमेलनानिमित्त संगीत खुर्ची, संगीतमय कार्यक्रम आणि विविध मनोरंजनात्मक उपक्रमांचे आयोजन करण्यात आले होते. यावेळी माजी विद्यार्थ्यांनी शालेय जीवनातील बालपणीच्या आठवणींना उजाळा दिला. शिक्षकांच्या हातातील छडी, वर्गातील गंमत-जंमत, मैदानावरील खेळ आणि शाळेतील खोडकर क्षणांच्या आठवणींनी उपस्थितांना जुन्या दिवसांत रमवले.
या स्नेहसंमेलनाला गोविंद माळवे, अमोल औटी, आकाश शिंदे, संतोष मांडे, विकास शिंदे, मयूर शिंदे, किशोर शिंदे, अमोल शिंदे, प्रमोद शिंदे, प्रमोद पवार, चंद्रशेखर शिंदे, दिलीप शिंदे, विठ्ठल शिनगारे, अमोल गायकवाड, आरती तारडे, अर्चना शिंदे, रूपाली शिंदे, माया शिंदे, अंजली शिंदे, वर्षा अर्जुन शिंदे, वर्षा किशोर शिंदे, संचिता शिंदे, गायत्री शिंदे, निकिता गायकवाड, शोभा माळवे आणि सविता खोसे आदी माजी विद्यार्थी उपस्थित होते.
अनेक वर्षांनंतर पुन्हा भेटलेल्या मित्र-मैत्रिणींनी जुन्या आठवणींना उजाळा देत आनंदाचे क्षण एकत्र अनुभवले. काळ बदलला, प्रत्येकजण आपापल्या आयुष्यात व्यस्त झाला; मात्र मैत्रीचे नाते आजही तितकेच घट्ट असल्याचा सुंदर प्रत्यय या स्नेहसंमेलनातून आला.
कार्यक्रम यशस्वी करण्यासाठी सहकार्य करणाऱ्या शिक्षकांचे, आयोजकांचे तसेच उपस्थित सर्व माजी विद्यार्थी मित्र-मैत्रिणींचे आभार व्यक्त करण्यात आले.
“शाळा सुटली, पाटी फुटली; पण मैत्री मात्र कायम राहिली!”
