जुन्या आठवणींना उजाळा; शाळेत एआय, रोबोटिक्स लॅब उभारण्याचा माजी विद्यार्थ्यांचा संकल्प
पुणे, दि. १४ नोव्हेंबर
बदलत्या काळानुसार पिढ्या बदलल्या, अनेकांचे केस पांढरे झाले; मात्र शाळेच्या आठवणींचा गोडवा आजही कायम आहे. ज्या वर्गखोल्यांमध्ये आयुष्याचा श्रीगणेशा झाला, त्याच शाळेच्या अंगणात तब्बल सात दशकांनंतर बालपणीचे मित्र पुन्हा एकत्र आले. डिंग्रजवाडी येथील जिल्हा परिषद प्राथमिक शाळेत गुरुवार, दि. १२ नोव्हेंबर २०२६ रोजी माजी विद्यार्थ्यांचा स्नेहमेळावा उत्साहात पार पडला.
मुख्याध्यापक छगन कुताळ, सहशिक्षक सूर्यकांत काळे, जयश्री वाळके मॅडम, भालेराव मॅडम, शिक्षकवृंद, शालेय व्यवस्थापन समिती आणि ग्रामस्थांच्या संकल्पनेतून या मेळाव्याचे आयोजन करण्यात आले होते.
या सोहळ्याचे विशेष आकर्षण म्हणजे १९५४ ते १९५७ या कालावधीत पहिल्या वर्गात शिक्षण घेतलेल्या माजी विद्यार्थ्यांची उपस्थिती. वयाची ८५ वर्षे ओलांडलेले सुखदेव गव्हाणे, मल्हारी गव्हाणे, आबासाहेब गव्हाणे आणि खंडूअण्णा गव्हाणे यांनी उत्साहाने सहभाग घेतला. अनेक वर्षांनंतर जुन्या मित्रांची भेट झाल्याने उपस्थितांच्या चेहऱ्यावर आनंद ओसंडून वाहत होता.
या स्नेहमेळाव्याला आजी-माजी शिक्षक मुख्याध्यापक तुळशीराम गोकुळे, टेमगिरे गुरुजी, भंडारी गुरुजी, लोंढे गुरुजी, मायने मॅडम आणि गोकुळे मॅडम उपस्थित होते. या शाळेने अनेक पिढ्या घडवून नोकरदार, अधिकारी, उद्योजक, व्यावसायिक आणि समाजसेवकांची मोठी फळी निर्माण केली, याचा प्रत्यय या भेटीतून आला.
नोकरी व व्यवसायानिमित्त मुंबई, पुणे, नाशिकसह राज्यातील आणि देशातील विविध शहरांत स्थायिक झालेले अनेक माजी विद्यार्थी दिवाळीनिमित्त गावी आले होते. त्यांनी या मेळाव्याला उपस्थित राहून जुन्या आठवणींना उजाळा दिला.
मात्र, हा मेळावा केवळ आठवणींमध्ये रमण्यापुरता मर्यादित न ठेवता शाळेच्या भविष्यासाठीही महत्त्वपूर्ण ठरला. गावातील पुढील पिढीला आधुनिक शिक्षणाच्या सुविधा उपलब्ध व्हाव्यात, या उद्देशाने शाळेत कृत्रिम बुद्धिमत्ता (एआय) लॅब, रोबोटिक्स लॅब, कॉन्फरन्स हॉल उभारणे, क्रीडांगण विकसित करणे आणि परिसराचे सुशोभीकरण करणे, अशा विविध योजना राबविण्याचा संकल्प माजी विद्यार्थ्यांनी केला. लोकवर्गणी आणि परस्पर सहकार्यातून शाळेला आंतरराष्ट्रीय दर्जाच्या शैक्षणिक सुविधांनी समृद्ध करण्याचा निर्धार व्यक्त करण्यात आला.
या संकल्पाबाबत देवदत्त कोतवाल, प्रताप गव्हाणे, विकास गव्हाणे, पोपट गव्हाणे आणि खंडूअण्णा गव्हाणे यांनी आपल्या मनोगतातून विचार मांडले.
कार्यक्रमाची सुरुवात राष्ट्रगीताने झाली. त्यानंतर माजी विद्यार्थ्यांच्या हस्ते दीपप्रज्वलन करण्यात आले. उपस्थित माजी विद्यार्थ्यांचे शाल, श्रीफळ आणि पुष्पगुच्छ देऊन स्वागत करण्यात आले. तसेच उल्लेखनीय कार्य करणाऱ्या उद्योजक, व्यावसायिक आणि समाजसेवी माजी विद्यार्थ्यांचा मेडल, शाल, श्रीफळ आणि पुष्पगुच्छ देऊन सन्मान करण्यात आला.
सूर्यकांत काळे यांनी सूत्रसंचालन व प्रास्ताविक केले. मुख्याध्यापक छगन कुताळ यांनी मनोगत व्यक्त केले. जयश्री वाळके यांनी उपस्थित मान्यवर, माजी विद्यार्थी-विद्यार्थिनी, शालेय समिती आणि आयोजकांचे आभार मानले. शाळेची घंटा वाजल्यानंतर जुन्या आठवणी आणि नव्या संकल्पांची शिदोरी घेऊन हा स्नेहमेळावा संपन्न झाला.
