दोन तृतीयांशपेक्षा अधिक जागांवर विजय; धीरज देशमुख यांनी बाभळगाव निवासस्थानी विजयी उमेदवारांचे केले अभिनंदन
उदगीर / प्रतिनिधी : महाराष्ट्रातील आदर्श आणि नामांकित सहकारी बँक म्हणून ओळखल्या जाणाऱ्या लातूर जिल्हा मध्यवर्ती सहकारी बँकेच्या निवडणुकीत सहकार पॅनलने दोन तृतीयांशपेक्षा अधिक जागांवर मोठ्या मताधिक्याने विजय मिळवला आहे. या पॅनलचे प्रमुख आणि बँकेचे विद्यमान अध्यक्ष, माजी आमदार धीरज देशमुख यांनी आज दुपारी सर्व विजयी उमेदवार व सहकाऱ्यांसह बाभळगाव येथील निवासस्थानी उपस्थित राहून सर्वांचे कौतुक केले आणि मनःपूर्वक अभिनंदन केले.
सहकार महर्षी तथा माजी मंत्री दिलीपराव देशमुख आणि राज्याचे विद्यमान सहकार मंत्री बाबासाहेब पाटील यांच्या मार्गदर्शनाखाली, बँकेचे विद्यमान अध्यक्ष धीरज देशमुख यांच्या नेतृत्वात सहकार पॅनलने हा विजय संपादन केला. हा विजय बँकेच्या पारदर्शक, विश्वासार्ह आणि विकासाभिमुख कारभाराला सभासदांनी दिलेली भक्कम पावती असल्याचे यावेळी नमूद करण्यात आले. चांगले काम केल्यास जनता पाठीशी खंबीरपणे उभी राहते, हे या निकालातून स्पष्ट झाल्याचेही सांगण्यात आले.
हा विजय केवळ एका पॅनलचा नसून सहकाराच्या विचारांवर विश्वास ठेवणाऱ्या प्रत्येक सभासदाचा, शेतकऱ्याचा आणि सहकार चळवळीशी जोडलेल्या सर्व घटकांचा असल्याची भावना यावेळी व्यक्त करण्यात आली. लातूर जिल्हा बँकेची प्रगतीची परंपरा अधिक सक्षम करण्यासाठी आणि सहकारातून समृद्धीचे स्वप्न साकार करण्यासाठी हा विजय नवी ऊर्जा देणारा ठरेल, असा विश्वास व्यक्त करण्यात आला.
या विजयातून मिळालेल्या ऊर्जेच्या बळावर सहकार पॅनलचे विजयी उमेदवार सर्वसामान्यांच्या जीवनात सकारात्मक बदल घडविण्यासाठी काळानुरूप नवनवीन योजना राबवतील आणि त्यांची प्रभावी अंमलबजावणी करण्यासाठी प्रयत्नशील राहतील, अशी अपेक्षाही यावेळी व्यक्त करण्यात आली.
धीरज देशमुख यांनी सहकार पॅनलमधील सर्व विजयी उमेदवारांचे मनःपूर्वक अभिनंदन केले. तसेच सर्व सभासद, मतदार, निवडणूक प्रक्रियेदरम्यान प्रचारासाठी परिश्रम घेणारे पदाधिकारी आणि कार्यकर्त्यांचे आभार मानले.
यावेळी लातूरचे खासदार डॉ. शिवाजी काळगे यांच्यासह जिल्हाभरातील विविध संस्थांचे पदाधिकारी, कार्यकर्ते आणि हितचिंतक मोठ्या संख्येने उपस्थित होते.











