जलजीवन मिशनचे कोट्यवधी रुपये खर्चूनही पाणीपुरवठा ठप्प? सावरगाव, आलेगाव, सोनुना यांसह सात गावांत भीषण टंचाई
पातूर : पातूर तालुक्यातील सावरगाव, आलेगाव, गोळेगाव, पिंपळडोळी आणि सोनुना यांसह परिसरातील अनेक गावांमध्ये भीषण पाणीटंचाई निर्माण झाली आहे. गावांमधील बोअरवेल आणि विहिरींनी तळ गाठल्याने पिण्याच्या पाण्यासाठी महिला, वृद्ध आणि लहान मुलांना वणवण भटकावे लागत आहे. मात्र, प्रशासन या गंभीर प्रश्नाकडे दुर्लक्ष करत असल्याचा आरोप शिवसेना (शिंदे गट) आलेगाव सर्कल प्रमुख निलेश तोताराम कापकर यांनी केला आहे.
या समस्येबाबत कापकर यांनी जिल्हाधिकारी, जिल्हा परिषदेचे मुख्य कार्यकारी अधिकारी आणि ग्रामीण पाणीपुरवठा विभागाला निवेदन दिले आहे. सावरगाव, आलेगाव, गोळेगाव, पिंपळडोळी आणि सोनुना या गावांमध्ये तातडीने विहिरींचे अधिग्रहण करून टँकरद्वारे नियमित पाणीपुरवठा सुरू करावा, अशी मागणी त्यांनी केली आहे.
जलजीवन मिशनअंतर्गत सोनुना, सावरगाव, गोळेगाव, आलेगाव, कार्ला, पिंपळडोळी आणि पाडशिंगी या गावांमध्ये कोट्यवधी रुपयांची कामे झाल्याचा दावा करण्यात येत आहे. मात्र, प्रत्यक्षात नळाला पाणी येत नसल्याच्या तक्रारी नागरिकांकडून होत आहेत. योजनेची कामे निकृष्ट दर्जाची आणि अपूर्ण असल्याचाही आरोप करण्यात आला आहे.
केवळ कागदोपत्री अहवाल न मागवता स्वतंत्र तांत्रिक समिती नेमून संबंधित गावांमध्ये प्रत्यक्ष पाहणी करावी आणि कामांमध्ये दोष आढळल्यास संबंधितांवर कारवाई करावी, अशी मागणी कापकर यांनी केली आहे.
सावरगाव आणि आलेगाव येथे ग्रामसेवक महिनाभरापासून गैरहजर असल्याने ग्रामस्थांची विविध कामे खोळंबली असल्याचे निवेदनात नमूद करण्यात आले आहे. तसेच ग्रामपंचायतीकडून अद्याप विहीर अधिग्रहणाचा प्रस्ताव पाठविण्यात आलेला नसल्याचा आरोपही करण्यात आला आहे.
प्रशासनाने तातडीने पाणीपुरवठ्याची व्यवस्था न केल्यास बुधवार, दि. १८ नोव्हेंबर २०२६ रोजी अकोला जिल्हा परिषदेच्या मुख्य कार्यकारी अधिकाऱ्यांच्या कार्यालयासमोर ‘मडके फोडो’ आंदोलन करण्यात येईल, असा इशारा निलेश कापकर यांनी दिला आहे.
‘पिण्याचे पाणी ही मूलभूत गरज आहे. योजना कागदावर पूर्ण दाखवून काय उपयोग, जर घरापर्यंत पाणीच येत नसेल? प्रशासनाने आश्वासनांऐवजी प्रत्यक्ष कृती करावी,’ असा सवाल कापकर यांनी उपस्थित केला आहे.











