राजू शेट्टी यांच्या मार्गदर्शनाखाली स्वाभिमानी शेतकरी संघटनेचा एल्गार; उसाला प्रतिटन ४ हजार रुपये दर देण्याची मागणी
कोळपेवाडी / प्रतिनिधी : ऊस उत्पादक शेतकऱ्यांच्या हक्काच्या दरासाठी स्वाभिमानी शेतकरी संघटनेने अहिल्यानगर जिल्ह्यात आंदोलनाचा एल्गार पुकारला आहे. संघटनेचे नेते राजू शेट्टी यांच्या मार्गदर्शनाखाली येत्या २३ नोव्हेंबर रोजी अहिल्यानगर जिल्हाधिकारी कार्यालयावर भव्य मोर्चा काढून जिल्हाधिकाऱ्यांना घेराव घालण्याचा निर्णय घेण्यात आला आहे. संघटनेचे पदाधिकारी रविंद्र मोरे, सुरेश टाके आणि अभिजीत पोटे यांनी ही भूमिका मांडली.
साखरेचे दर प्रतिकिलो ५४ रुपयांपर्यंत पोहोचले असतानाही साखर कारखानदार ऊस उत्पादक शेतकऱ्यांना योग्य मोबदला देत नसल्याचा आरोप संघटनेने केला आहे. त्यामुळे उसाला प्रतिटन ४ हजार रुपये दर मिळावा, ही या आंदोलनातील प्रमुख मागणी आहे.
पालकमंत्री राधाकृष्ण विखे पाटील यांनी जाहीर केलेला प्रतिटन ३,१४९ रुपयांचा दर संघटनेने अमान्य केला आहे. जिल्ह्यातील १७ साखर कारखान्यांकडून शेतकऱ्यांचे सुमारे ३०० कोटी रुपये लुटले जात असल्याचा गंभीर आरोपही संघटनेच्या पदाधिकाऱ्यांनी केला आहे.
पालकमंत्र्यांनी बोलावलेल्या बैठकीला साखर कारखान्यांचे अध्यक्ष उपस्थित राहिले नसल्याबद्दल संघटनेच्या पदाधिकाऱ्यांनी नाराजी व्यक्त केली. तसेच शासकीय विश्रामगृहात पत्रकार परिषद घेण्यासाठी साधी खोलीही उपलब्ध करून देण्यात आली नसल्याचा आरोप करत पदाधिकाऱ्यांनी जमिनीवर बसून प्रशासनाचा निषेध नोंदविला.
ऊस उत्पादक शेतकऱ्यांना त्यांच्या उसाचा योग्य मोबदला मिळणे आवश्यक असल्याचे सांगत, उसाला प्रतिटन ४ हजार रुपये दर मिळाल्याशिवाय आणि मागण्या मान्य झाल्याशिवाय आंदोलनातून माघार घेणार नसल्याचा ठाम इशारा स्वाभिमानी शेतकरी संघटनेने दिला आहे. त्यामुळे २३ नोव्हेंबरच्या मोर्चाकडे ऊस उत्पादक शेतकऱ्यांचे लक्ष लागले आहे.










