आधुनिक कृषी तंत्रज्ञान, प्रगत शेती आणि नवनवीन संकल्पनांचा संगम; जगातील सर्वात लहान २.८ फुटांची ‘राधा’ म्हैस ठरणार विशेष आकर्षण
कोळपेवाडी : कर्मवीर शंकरराव काळे साहेब यांच्या १४ व्या पुण्यस्मरणानिमित्त कर्मवीर शंकरराव काळे सहकारी साखर कारखाना आणि शंकरराव काळे मित्र मंडळ यांच्या वतीने ‘कर्मवीर कृषी महोत्सव २०२६’ आयोजित करण्यात आला आहे. हा महोत्सव २१, २२ आणि २३ नोव्हेंबर २०२६ रोजी गौतम नगर पब्लिक स्कूल, गौतम नगर, तालुका कोपरगाव येथे संपन्न होणार आहे.
या महोत्सवात शेतकरी मेळावा, सर्वरोग निदान शिबिर, कृषिविषयक चर्चासत्रे, आधुनिक सिंचन पद्धतींची माहिती, कृषी निविष्ठा तसेच शेतीसाठी लागणाऱ्या आधुनिक अवजारांचे भव्य प्रदर्शन अशा विविध उपक्रमांची मेजवानी शेतकरी बांधवांना अनुभवता येणार आहे.
या कृषी महोत्सवाचे विशेष आकर्षण म्हणजे ग्रीनिज बुक ऑफ वर्ल्ड रेकॉर्डमध्ये नोंद असल्याचे सांगितली जाणारी जगातील सर्वात लहान २.८ फुटांची ‘राधा’ म्हैस. या अनोख्या म्हशीला पाहण्याची संधी महोत्सवात मिळणार आहे.
शेती क्षेत्रातील नवनवीन तंत्रज्ञानाची माहिती घेण्यासाठी, आधुनिक शेती पद्धती समजून घेण्यासाठी आणि कृषी क्षेत्रातील प्रगतीच्या नव्या संधी जाणून घेण्यासाठी सर्व शेतकरी बांधवांनी या महोत्सवाला आवर्जून भेट द्यावी, असे आवाहन आयोजकांच्या वतीने करण्यात आले आहे.
कृषी क्षेत्रातील आधुनिक तंत्रज्ञान, नव्या संकल्पना आणि प्रगत शेती पद्धती यांचा परिचय करून देणारा हा महोत्सव शेतकऱ्यांसाठी उपयुक्त ठरणार आहे.










