शंभूराज देसाई आणि मकरंद पाटील यांची रणनीती यशस्वी; राष्ट्रवादी-शिवसेनेने एकत्र येत भाजपला सत्तेबाहेर ठेवले
सातारा | दि. १८ नोव्हेंबर
सातारा जिल्हा मध्यवर्ती सहकारी बँकेच्या अध्यक्षपदाची निवड मुख्यमंत्री देवेंद्र फडणवीस ठरवणार, या चर्चेला पूर्णविराम देत शिवसेना आणि राष्ट्रवादी काँग्रेसने भाजपला मोठा धक्का दिला आहे. बँकेच्या अध्यक्षपदी राष्ट्रवादी काँग्रेसचे उदयसिंह पाटील उंडाळकर यांची, तर उपाध्यक्षपदी शिवसेनेचे दीपक चव्हाण यांची निवड झाली आहे. या निवडीमुळे जिल्हा बँकेतील सत्तेचे समीकरण बदलले आहे.
सातारा जिल्हा परिषदेत झालेल्या राजकीय घडामोडींच्या पार्श्वभूमीवर शिवसेनेचे नेते तथा मंत्री शंभूराज देसाई आणि राष्ट्रवादी काँग्रेसचे नेते तथा मंत्री मकरंद पाटील यांनी जिल्हा बँकेच्या अध्यक्ष-उपाध्यक्ष निवडीत समन्वय साधल्याचे चित्र आहे. दोन्ही नेत्यांनी एकत्रित रणनीती आखत भाजपला सत्तेबाहेर ठेवण्यात यश मिळवले.
सातारा जिल्हा बँकेच्या निवडणुकीत एकूण २१ जागांपैकी भाजपचे ९, राष्ट्रवादी काँग्रेसचे ८ आणि शिवसेनेचे ४ उमेदवार निवडून आले होते. त्यामुळे अध्यक्षपदाच्या निवडीकडे संपूर्ण जिल्ह्याचे लक्ष लागले होते.
या निवडणुकीनंतर मंत्री जयकुमार गोरे यांनी मुख्यमंत्री देवेंद्र फडणवीस हेच बँकेचा अध्यक्ष कोण होणार, याचा निर्णय घेतील, असे वक्तव्य केले होते. मात्र, अध्यक्षपदाचा निर्णय स्थानिक पातळीवर आणि जिल्ह्यातील राजकीय समीकरणांचा विचार करून व्हावा, अशी भूमिका शंभूराज देसाई आणि मकरंद पाटील यांनी घेतल्याचे सांगितले जाते.
या पार्श्वभूमीवर दोन्ही मंत्र्यांमध्ये चर्चा आणि बैठका झाल्या. त्यातून समन्वयाचा मार्ग काढत राष्ट्रवादी काँग्रेसकडून उदयसिंह पाटील उंडाळकर यांनी अध्यक्षपदासाठी, तर शिवसेनेकडून दीपक चव्हाण यांनी उपाध्यक्षपदासाठी उमेदवारी अर्ज दाखल केला. त्यानंतर निवडणूक प्रक्रियेत दोघांचीही निवड जाहीर करण्यात आली.
दरम्यान, भाजपच्या नवनियुक्त संचालकांची बैठक मंत्री शिवेंद्रसिंहराजे भोसले यांच्या सुरुची बंगल्यावर झाल्याची माहिती आहे. मात्र, या बैठकीत अध्यक्ष-उपाध्यक्ष निवडीसाठी आवश्यक राजकीय समीकरण जुळवण्यात भाजपला यश आले नाही.
राष्ट्रवादी काँग्रेस आणि शिवसेनेने एकत्र येत केलेल्या या राजकीय खेळीमुळे सातारा जिल्हा बँकेच्या सत्तेची सूत्रे भाजपच्या हातात जाण्याची शक्यता संपुष्टात आली. या निवडीची जिल्ह्याच्या राजकीय वर्तुळात जोरदार चर्चा सुरू आहे.









