केज येथे वरिष्ठ व निवड वेतनश्रेणी प्रशिक्षण सुरू; २४८ शिक्षकांचा सहभाग, २० सुलभकांकडून मार्गदर्शन
केज | प्रतिनिधी
राज्य शैक्षणिक संशोधन व प्रशिक्षण परिषद, महाराष्ट्र, पुणे आणि जिल्हा शिक्षण व प्रशिक्षण संस्था (डायट), अंबाजोगाई यांच्या संयुक्त विद्यमाने केज तालुक्यातील पात्र शिक्षकांसाठी वरिष्ठ व निवड वेतनश्रेणी प्रशिक्षणाचे आयोजन करण्यात आले आहे. साने गुरुजी निवासी विद्यालय, धारूर रोड, केज येथे दि. १३ ते २२ नोव्हेंबर २०२६ या कालावधीत दहा दिवसांचे प्रशिक्षण सुरू आहे.
या प्रशिक्षणादरम्यान डायटचे प्राचार्य डॉ. अनिल मुरकुटे आणि अधिव्याख्याता डॉ. राजेश गोरे यांनी भेट देऊन प्रशिक्षणार्थी शिक्षकांच्या विविध गटांना मार्गदर्शन केले.
यावेळी बोलताना डॉ. अनिल मुरकुटे म्हणाले की, विविध प्रशिक्षणांमधून शिक्षक समृद्ध होत असतो. हे प्रशिक्षण केवळ वेतनश्रेणीतील वाढीसाठी नसून, राष्ट्रनिर्मितीच्या कार्यात शिक्षक अधिक सक्षमपणे योगदान देऊ शकेल, यासाठीही महत्त्वाचे आहे. शिक्षण क्षेत्रात सातत्याने होत असलेले नवनवीन बदल शिक्षकांनी आत्मसात करून ते विद्यार्थ्यांपर्यंत पोहोचवणे आवश्यक आहे. शिक्षकांच्या कार्यात सातत्य आणि गुणवत्ता निर्माण व्हावी, यासाठी अशा प्रशिक्षणांची गरज असते.
शाळेत शिकवणे हे शिक्षकाचे कर्तव्य असले, तरी ती राष्ट्रनिर्मितीसाठी स्वतः स्वीकारलेली सेवा आहे. ही सेवा करण्याची संधी शिक्षकांना मिळाली असून, त्या संधीचे सोने करणे ही प्रत्येकाची जबाबदारी आहे, असेही त्यांनी नमूद केले.
या प्रशिक्षणामुळे वेतनात वाढ होणार असली, तरी आपण करत असलेली शैक्षणिक सेवा अधिक चांगल्या पद्धतीने पार पाडल्याचे समाधान अधिक मोलाचे आहे. हे समाधान कोणत्याही गोष्टीत मोजता येणार नाही. राष्ट्रनिर्मितीच्या महान कार्यात प्रत्येक शिक्षकाचा महत्त्वाचा वाटा असतो, असे प्रतिपादनही डॉ. मुरकुटे यांनी केले.
साने गुरुजी संकुलात सुरू असलेल्या या प्रशिक्षणात एकूण २४८ शिक्षक सहभागी झाले असून, २० सुलभक त्यांना प्रशिक्षण देत आहेत. प्रशिक्षणाचे नियोजन शिस्तबद्ध आणि उत्तम पद्धतीने सुरू असल्याबद्दल डॉ. मुरकुटे यांनी समाधान व्यक्त केले आणि सर्व प्रशिक्षणार्थींना शुभेच्छा दिल्या.
यावेळी डायटचे अधिव्याख्याता डॉ. राजेश गोरे, साने गुरुजी निवासी विद्यालयाच्या प्राचार्या डॉ. कविता कराड, संस्थेचे अध्यक्ष उद्धवराव कराड आणि प्रशिक्षण समन्वयक तथा ज्येष्ठ शिक्षण विस्तार अधिकारी सुनील केंद्रे उपस्थित होते.









