नियमित आणि पूर्ण धान्य मिळत नसल्याच्या तक्रारी; ऑक्टोबर-नोव्हेंबरचे रेशन न मिळाल्याने ग्रामपंचायतीच्या वतीने आंदोलनाचे आयोजन
मनुरवाडी | प्रतिनिधी
गरीब आणि गरजू नागरिकांना त्यांच्या हक्काचे रेशन नियमित व पूर्ण मिळावे, या मागणीसाठी मनुरवाडी ग्रामपंचायतीच्या वतीने माजलगाव तहसील कार्यालयावर धडक मोर्चा काढण्यात येणार आहे. उद्या, गुरुवार दि. १९ नोव्हेंबर रोजी सकाळी १० वाजता माजलगाव तहसील कार्यालयासमोर या मोर्चाचे आयोजन करण्यात आले आहे.
मनुरवाडी गावातील अनेक नागरिकांना नियमितपणे रेशन मिळत नसल्याच्या, काही लाभार्थ्यांना मंजूर प्रमाणापेक्षा कमी धान्य मिळत असल्याच्या तसेच ऑक्टोबर आणि नोव्हेंबर महिन्याचे रेशन अद्याप मिळाले नसल्याच्या तक्रारी ग्रामस्थांकडून करण्यात येत आहेत.
रेशन हा गरीब जनतेचा हक्क असून, प्रत्येक पात्र लाभार्थ्याला त्याच्या हक्काचे धान्य पूर्ण प्रमाणात आणि वेळेवर मिळाले पाहिजे, अशी ग्रामस्थांची मागणी आहे. या समस्येकडे प्रशासनाचे लक्ष वेधण्यासाठी ग्रामपंचायत मनुरवाडीच्या वतीने तहसील कार्यालयावर मोर्चा काढण्याचा निर्णय घेण्यात आला आहे.
या मोर्चात गावातील सर्व नागरिकांनी मोठ्या संख्येने सहभागी व्हावे, असे आवाहन करण्यात आले आहे. आपल्या हक्काच्या रेशनसाठी सर्वांनी एकजुटीने पुढे येऊन या लढ्यात सहभागी व्हावे, अशी कळकळीची विनंती ग्रामस्थांना करण्यात आली आहे.











