‘श्री ज्ञानेश्वरी भावकथा’ ज्ञानयज्ञ सोहळ्यात कवी राजेंद्र द्वारकानाथ पाटील यांच्या पहिल्या वैयक्तिक काव्यसंग्रहाचे अनावरण; ५०० ते ६०० श्रोत्यांची उपस्थिती
कल्याण | प्रतिनिधी :
मराठी साहित्यविश्वात अनेक वर्षांपासून सातत्याने काव्यलेखन करणारे कवी राजेंद्र द्वारकानाथ पाटील यांच्या पहिल्या वैयक्तिक काव्यसंग्रहाचे ‘मधुगंध’ या नावाने प्रकाशन शनिवार, दि. १४ नोव्हेंबर २०२६ रोजी निळजे येथे उत्साहात पार पडले. ग्रामस्थ मंडळ निळजे आयोजित भव्य ‘श्री ज्ञानेश्वरी भावकथा’ ज्ञानयज्ञ सोहळ्यात मान्यवरांच्या हस्ते या काव्यसंग्रहाचे प्रकाशन करण्यात आले.
कवी राजेंद्र पाटील यांनी गेल्या अनेक वर्षांत विविध प्रातिनिधिक काव्यसंग्रहांसह वृत्तपत्रे, साप्ताहिके, मासिके आणि दिवाळी अंकांमधून विपुल काव्यलेखन केले आहे. त्यांच्या साहित्यप्रवासातील महत्त्वाचा टप्पा ठरलेल्या ‘मधुगंध’ या पहिल्या वैयक्तिक काव्यसंग्रहाच्या प्रकाशनामुळे साहित्यप्रेमींमध्ये आनंदाचे वातावरण निर्माण झाले.
या आध्यात्मिक आणि साहित्यिक सोहळ्याला पंचक्रोशीतील सुमारे ५०० ते ६०० श्रोते तसेच मोठ्या संख्येने साहित्यप्रेमी उपस्थित होते. सोहळ्याचे कथा प्रवक्ते कोकणरत्न, प्रबोध मार्तंड ह. भ. प. श्री. विश्वनाथ महाराज वारिंगे, कल्याण ग्रामीणचे विद्यमान आमदार राजेशजी मोरे, विद्यमान नगरसेवक गजानन पाटील, उच्चविद्याविभूषित कीर्तनकार ह. भ. प. श्री. जयेश महाराज भाग्यवंत, कीर्तनकार ह. भ. प. श्री. शरद महाराज पाटील तसेच सुप्रसिद्ध गायक आणि अन्य मान्यवरांच्या प्रमुख उपस्थितीत प्रकाशन सोहळा संपन्न झाला.
कार्यक्रमाच्या यशस्वी आयोजनाबद्दल ग्रामस्थ मंडळ निळजे यांचे सर्वत्र कौतुक होत आहे. ‘मधुगंध’ या काव्यसंग्रहाच्या रूपाने मराठी साहित्यविश्वात एका नव्या काव्यसंग्रहाची भर पडली असून, कवी राजेंद्र पाटील यांच्या साहित्यप्रवासातील हा महत्त्वाचा क्षण असल्याची भावना उपस्थित साहित्यप्रेमींनी व्यक्त केली.











