एनडीआरएफच्या निकषानुसार हेक्टरी ११ हजारांऐवजी २२ हजार रुपये मदत द्यावी; तळेगाव डवला परिसरातील शेतकऱ्यांची मागणी
तेल्हारा | प्रतिनिधी : तेल्हारा तालुक्यातील तळेगाव डवला परिसरात यंदा पावसाचे प्रमाण कमी झाल्याने दुष्काळी परिस्थिती निर्माण झाली आहे. अशा परिस्थितीत शासनाकडून शेतकऱ्यांना मिळणारी मदत तुटपुंजी असल्याने शेतकऱ्यांमध्ये नाराजी व्यक्त होत आहे. शासनाने दुष्काळी मदतीच्या रकमेत तातडीने वाढ करून ती एकरकमी शेतकऱ्यांच्या खात्यात जमा करावी, अशी जोरदार मागणी शेतकऱ्यांकडून होत आहे.
यंदा पाऊस कमी झाल्यामुळे पूर्णा नदी, विहिरी आणि बोअरवेल कोरडे पडले आहेत. परिणामी भूजल पातळीतही मोठी घट झाली असून शेतीसमोर पाणीटंचाईचे संकट उभे राहिले आहे. या परिस्थितीत जाहीर करण्यात आलेली मदत शेतकऱ्यांच्या नुकसानीच्या तुलनेत अपुरी असल्याचे शेतकऱ्यांचे म्हणणे आहे.
शासनाने जाहीर केलेली पाच हजार ते दोन हजार रुपयांची मदत म्हणजे, “आमच्या जखमेवर मीठ चोळण्यासारखे आहे,” अशी भावना शेतकऱ्यांनी व्यक्त केली. एनडीआरएफच्या निकषानुसार हेक्टरी ११ हजार रुपयांऐवजी २२ हजार रुपये मदत द्यावी, तळेगाव डवला परिसराला हंगामी बागायत क्षेत्र म्हणून संबोधण्यात यावे आणि दुष्काळी मदत एकरकमी देण्यात यावी, अशा मागण्या करण्यात आल्या आहेत.
याबाबत शेतकरी कैलास पाटील शेजोळे (रा. गौळखेड, ह.मु. तळेगाव डवला, ता. तेल्हारा, जि. अकोला) यांनी शासनाने मदतीत वाढ करण्याची मागणी केली आहे.
दुष्काळाच्या काळात शेतकऱ्यांना आधार देणे हे शासनाचे कर्तव्य आहे. केवळ घोषणा करून चालणार नाही, तर प्रत्यक्ष मदत शेतकऱ्यांच्या खात्यात जमा झाली पाहिजे, अशी भावना शेतकऱ्यांनी व्यक्त केली आहे.









