सरासरी ५३ हजार ३४३ हेक्टर क्षेत्रापैकी आतापर्यंत केवळ १ हजार ५७८ हेक्टरवर पेरणी; दुष्काळामुळे जलस्रोतांची पाणीपातळी खालावली
निलंगा | प्रतिनिधी :
यंदा पावसाने पाठ फिरवल्याने निलंगा तालुक्यातील शेतीचे अर्थकारण कोलमडले असून, रबी हंगामावरही दुष्काळाचे सावट निर्माण झाले आहे. सरासरीच्या ५० टक्क्यांपेक्षाही कमी पाऊस झाल्याने जलस्रोतांची पाणीपातळी खालावली आहे. परिणामी, रबी हंगामाच्या सुरुवातीलाच पेरणीचा वेग मंदावला आहे. तालुक्यात रबी पिकांचे सरासरी क्षेत्र ५३ हजार ३४३ हेक्टर असताना आतापर्यंत केवळ १ हजार ५७८ हेक्टर क्षेत्रावर पेरणी झाली आहे. म्हणजेच सरासरी क्षेत्राच्या अवघ्या तीन टक्के क्षेत्रावर पेरणी झाल्याची माहिती तालुका कृषी अधिकारी एन. आर. शिंदे यांनी दिली.
दुष्काळातही शेतकऱ्यांनी आशा सोडू नये
यंदाच्या दुष्काळी परिस्थितीत शेतकऱ्यांसमोर शेती टिकविण्याबरोबरच पशुधन जगविण्याचेही मोठे आव्हान आहे. उपलब्ध पाण्याचा योग्य वापर, आधुनिक तंत्रज्ञानाची जोड आणि कमी पाण्यात येणाऱ्या पिकांचे नियोजन यावरच रबी हंगामाचे भवितव्य अवलंबून आहे. शेतकऱ्यांनी संकटाला न घाबरता बदलत्या परिस्थितीनुसार शेती पद्धतीत बदल करावा, असे आवाहन छावा संघटनेचे निलंगा तालुकाध्यक्ष तथा शेतकरी तुळशीदास साळुंके यांनी केले.
तालुक्यातील दुष्काळी परिस्थिती लक्षात घेता शेतकऱ्यांनी उपलब्ध पाण्याचा अंदाज घेऊनच पेरणीचे नियोजन करावे, असे आवाहन कृषी विभागाने केले आहे. ज्या शेतकऱ्यांकडे मुबलक पाणी उपलब्ध आहे, त्यांनी हरभरा पिकाला प्राधान्य द्यावे. तर कमी पाणी उपलब्ध असलेल्या शेतकऱ्यांनी करडी, जवस आणि ज्वारी यांसारख्या कमी पाण्यात येणाऱ्या पिकांची निवड करावी, असे मार्गदर्शन कृषी विभागाकडून करण्यात आले आहे.
थेंब थेंब पाण्याचा वापर करा!
दुष्काळी परिस्थितीमुळे शेतकऱ्यांनी खचून न जाता उपलब्ध पाण्याचे काटेकोर नियोजन करणे गरजेचे आहे. ठिबक सिंचन, तुषार सिंचन आणि रेनपाइप यांसारख्या आधुनिक सिंचन पद्धतींचा वापर वाढवून कमी पाण्यात अधिक उत्पादन घेण्याचा प्रयत्न करावा. शेतीबरोबरच जनावरांच्या चाऱ्याचा प्रश्नही गंभीर होत असल्याने चारा उपलब्ध होईल, अशा पिकांना प्राधान्य देण्याची गरज निर्माण झाली आहे.









