देशभरातील ३६ राज्ये व केंद्रशासित प्रदेशांतील सुमारे १,००० खेळाडूंचा सहभाग; २३ ते २७ नोव्हेंबरदरम्यान डे-नाईट स्पर्धेचे आयोजन
शिर्डी | प्रतिनिधी :
श्री साईबाबा संस्थान विश्वस्तव्यवस्था, शिर्डी संचलित श्री साईबाबा शैक्षणिक संकुलात ७० व्या राष्ट्रीय शालेय व्हॉलीबॉल स्पर्धेचे आयोजन करण्यात आले आहे. दि. २३ ते २७ नोव्हेंबर २०२६ या कालावधीत डे-नाईट पद्धतीने ही स्पर्धा पार पडणार असून, १४ वर्षांखालील मुले व मुलींचे संघ यात सहभागी होणार आहेत.
या राष्ट्रीय स्पर्धेत देशभरातील ३६ राज्ये व केंद्रशासित प्रदेशांमधून सुमारे १,००० खेळाडू सहभागी होणार आहेत. याशिवाय सुमारे २०० पंच आणि प्रशिक्षकांची उपस्थिती राहणार आहे. अशा प्रकारे एकूण सुमारे १,२०० जण या स्पर्धेनिमित्त शिर्डीत दाखल होणार आहेत.
या स्पर्धेत उत्कृष्ट कामगिरी करणाऱ्या खेळाडूंना आंतरराष्ट्रीय स्तरावर भारताचे प्रतिनिधित्व करण्याची संधी मिळू शकते. त्यामुळे युवा खेळाडूंसाठी ही स्पर्धा आपले कौशल्य आणि गुणवत्ता सिद्ध करण्याची महत्त्वपूर्ण संधी ठरणार आहे.
राष्ट्रीय स्तरावरील या स्पर्धेच्या आयोजनामुळे शिर्डीच्या क्रीडा क्षेत्रात उत्साहाचे वातावरण निर्माण झाले असून, देशभरातील युवा व्हॉलीबॉल खेळाडूंच्या कौशल्यपूर्ण खेळाचा थरार शिर्डीकरांना अनुभवता येणार आहे.









