गटविकास अधिकाऱ्यांच्या मार्गदर्शनाखाली ग्रामपंचायतीचा पुढाकार; रोपांच्या संगोपनावर विशेष भर
येवला | प्रतिनिधी : दुष्काळी परिस्थितीतही गावातील हिरवाई टिकवून ठेवणे आणि पर्यावरणाचा समतोल राखणे, हा उद्देश समोर ठेवून ग्रामपंचायत कुसूरच्या वतीने ‘आजचे रोप, उद्याचे वृक्ष’ या संकल्पनेअंतर्गत निसर्ग संवर्धन मोहीम राबविण्यात येत आहे. येवला येथील गटविकास अधिकाऱ्यांच्या मार्गदर्शनाखाली हा उपक्रम गतिमान करण्यात आला असून, यामध्ये आवळा लागवडीवर विशेष भर देण्यात येत आहे.
सध्या बदलते हवामान आणि कमी पावसामुळे दुष्काळाची तीव्रता जाणवत आहे. अशा परिस्थितीत केवळ वृक्षारोपण करून न थांबता लावलेल्या रोपांचे संवर्धन आणि संगोपन करणे ही काळाची गरज बनली आहे. याच पार्श्वभूमीवर कमी पाण्यात आणि प्रतिकूल परिस्थितीतही तग धरू शकणाऱ्या आवळ्याच्या झाडांची लागवड करून गावात हरित पट्टा निर्माण करण्याचे नियोजन करण्यात आले आहे. आवळा लागवडीचा हा छोटासा प्रयत्न म्हणजे उद्याच्या हिरव्यागार भविष्याची पेरणी असल्याची भावना या मोहिमेतून व्यक्त होत आहे.
या उपक्रमांतर्गत सार्वजनिक ठिकाणे, शाळा परिसर, रस्त्यांच्या दुतर्फा तसेच गावातील मोकळ्या जागांवर आवळा आणि इतर स्थानिक प्रजातींच्या पूरक रोपांची लागवड करण्यात येणार आहे. ठिबक सिंचनाद्वारे रोपांना नियमित पाणीपुरवठा करून त्यांची निगा राखण्याचा निर्धारही करण्यात आला आहे.
आज लावलेली रोपे भविष्यात मोठी होऊन गावाला सावली, शुद्ध हवा, जलसंधारण आणि आरोग्यदायी फळांच्या माध्यमातून आधार देतील, असा विश्वास व्यक्त केला जात आहे.
निसर्ग संवर्धनाच्या या लोकचळवळीत ग्रामस्थ, महिला बचत गट, युवक मंडळे, शालेय विद्यार्थी आणि ग्रामपंचायत कर्मचाऱ्यांनी मोठ्या संख्येने सहभागी व्हावे आणि लावलेल्या प्रत्येक रोपाचे जतन करण्याची जबाबदारी स्वीकारावी, असे आवाहन ग्रामपंचायत प्रशासनाच्या वतीने करण्यात आले आहे.











