अंतिम सामन्यात एकता क्रिकेट क्लब दिंद्रुडचा ८ विकेटने पराभव; ५१ हजारांचे पारितोषिक
दिंद्रुड | प्रतिनिधी : जय श्रीराम क्रिकेट क्लबच्या वतीने युवानेते मुन्नाभैय्या ठोंबरे यांच्या नेतृत्वाखाली आयोजित वनहाफ क्रिकेट स्पर्धेत सय्यद रायडर्स सिरसाळा संघाने विजेतेपद पटकावले. बुधवारी झालेल्या अटीतटीच्या अंतिम सामन्यात सय्यद रायडर्सने एकता क्रिकेट क्लब दिंद्रुडचा ८ विकेटने पराभव करत ट्रॉफी आणि ५१ हजार रुपयांचे पारितोषिक जिंकले.
या स्पर्धेत परभणी जिल्ह्यातील पाथरी, गंगाखेड, सोनपेठ तसेच बीड जिल्ह्यातील बीड, परळी, माजलगाव व धारूर तालुक्यांतील ३० ग्रामीण आणि शहरी क्रिकेट संघांनी सहभाग नोंदवला. बुधवारी झालेल्या उपांत्य फेरीत सय्यद रायडर्स सिरसाळा संघाने महातपुरी, गंगाखेड संघावर मात केली, तर एकता क्रिकेट क्लब दिंद्रुडने आदीअनुज क्रिकेट संघ परळीचा पराभव करून अंतिम फेरीत प्रवेश केला.
अंतिम सामन्यात एकता क्रिकेट क्लब दिंद्रुडने प्रथम फलंदाजी करत निर्धारित ८ षटकांत ८४ धावांचे आव्हान उभे केले. प्रत्युत्तरात सय्यद रायडर्स सिरसाळाच्या फलंदाजांनी आक्रमक खेळ करत अवघ्या ५ षटकांत ८८ धावा फटकावल्या. त्यामुळे सिरसाळा संघाने ८ विकेटने दणदणीत विजय मिळवत स्पर्धेच्या विजेतेपदावर नाव कोरले.
अंबाजोगाईचे पंच अमोल गोचडे आणि दिंद्रुडचे रवि काशिद यांनी अचूक निर्णय देत सामन्याची धुरा सांभाळली. स्पर्धेचे पारितोषिक वितरण दिंद्रुड पोलीस ठाण्याचे सहाय्यक पोलीस निरीक्षक महेश भोसले, युवानेते मुन्ना ठोंबरे, शाम काशिद, शेख वसीम, विकास लगड आणि सिद्धार्थ मायंदळे यांच्या उपस्थितीत करण्यात आले.
दिंद्रुड पोलीस आणि स्थानिक युवकांच्या देखरेखीखाली ही स्पर्धा शांततेत व उत्साहपूर्ण वातावरणात पार पडली. क्रीडा समालोचक महादेव मुजमुले, बाबा किरवले आणि शाम काशिद यांनी प्रभावी समालोचन केले. ग्रामीण भागातील क्रिकेटपटूंना व्यासपीठ उपलब्ध करून देणाऱ्या या स्पर्धेला क्रिकेटप्रेमींचा उत्स्फूर्त प्रतिसाद मिळाला.
स्पर्धेच्या यशस्वी आयोजनासाठी समितीतील सिद्धेश्वर ठोंबरे, आत्माराम चामनार, सुरेश राठोड, मुंजा पारेकर, किशोर ठोंबरे, गणेश काटकर, बाळासाहेब ठोंबरे, अजित काकडे, दिग्विजय ठोंबरे आणि अलीम सय्यद यांनी उत्कृष्ट नियोजन केले.










