चार महिन्यांच्या हरिपाठ पठणानंतर आणि महिनाभराच्या काकडा आरतीनंतर दिंडीने गावात प्रदक्षिणा
लोहारा | प्रतिनिधी : लोहारा तालुक्यातील नागूर येथे कार्तिकी भागवत एकादशीनिमित्त भक्तिमय वातावरणात दिंडीचे आयोजन करण्यात आले होते. चार महिन्यांच्या हरिपाठ पठणानंतर तसेच महिनाभर काकडा आरतीचे श्रवण केल्यानंतर या धार्मिक उपक्रमाची सांगता दिंडीने करण्यात आली.
गावातील नागोबा मंदिरातून दिंडीला सुरुवात झाली. टाळ-मृदंगाच्या गजरात आणि हरिनामाच्या जयघोषात दिंडीने संपूर्ण गावातून मार्गक्रमण केले. त्यानंतर नागोबा मंदिरात दिंडीची सांगता करण्यात आली.
या दिंडीमध्ये ध्वजधारी म्हणून कु. राधेश्याम भांगे, पखवाजवादक श्री. राजकुमार सूर्यवंशी आणि विणेकरी श्री. मारुती जाधव यांची प्रमुख उपस्थिती होती. टाळकरी वृंदात श्री. विलास चंदनशिवे, श्री. शहाजी जावळे, श्री. जगन्नाथ मसलकर, श्री. सत्यवान भांगे, श्री. आण्णा (महाराज) जावळे, श्री. आप्पासाहेब मसलकर, श्री. विक्रम पवार, श्री. राम कांबळे, श्री. हरी सलगरे, श्री. दत्ता मोरे आणि कु. श्रीनिवास मोरे यांच्यासह गावातील नागरिक सहभागी झाले होते.
दिंडीमुळे नागूर गावात भक्तिमय वातावरण निर्माण झाले होते. ग्रामस्थांनी उत्साहाने सहभाग नोंदवत धार्मिक परंपरेचा आनंद घेतला.










