भाजपची मागणी; विरोधी पक्षनेते मनोज पाटील यांचे महापौर आणि महापालिका आयुक्तांना निवेदन
विरार | प्रतिनिधी : वसई-विरार महापालिकेच्या विरार पश्चिम येथील बोळींज क्रीडा संकुलाला वसई मुक्तिसंग्रामाचे नेतृत्व करणारे नरवीर चिमाजी अप्पा यांचे नाव देण्यात यावे, अशी मागणी भाजपच्या वतीने करण्यात आली आहे. यासंदर्भात महापालिकेचे विरोधी पक्षनेते मनोज पाटील यांनी २१ नोव्हेंबर रोजी महापौर अजीव जी. पाटील आणि महापालिका आयुक्त पृथ्वीराज बी. पी. यांच्याकडे लेखी निवेदन सादर केले.
बाजीराव पेशवे यांचे धाकटे बंधू नरवीर चिमाजी अप्पा यांच्या अतुलनीय पराक्रमामुळे वसईची पोर्तुगीज राजवटीतून मुक्तता झाली. वसईच्या इतिहासात त्यांच्या शौर्याला आणि कर्तृत्वाला अनन्यसाधारण महत्त्व आहे.

या महान योद्ध्याच्या स्मृती जतन करण्यासाठी आणि त्यांच्या पराक्रमाची प्रेरणा भावी पिढ्यांना मिळावी, यासाठी विरार पश्चिम येथील मौजे बोळींजमधील महापालिकेच्या क्रीडा संकुलाचे ‘नरवीर चिमाजी अप्पा क्रीडा संकुल, बोळींज’ असे नामकरण करण्यात यावे, अशी आग्रही मागणी निवेदनाद्वारे करण्यात आली आहे.
विरार आणि नालासोपारा परिसरातील नागरिकांना, विशेषतः युवा पिढीला, नरवीर चिमाजी अप्पा यांच्याप्रती कृतज्ञता व्यक्त करण्याची ही योग्य संधी ठरेल, अशी भावना मनोज पाटील यांनी व्यक्त केली.
या मागणीचा सकारात्मक विचार करून नामकरणाचा प्रस्ताव महापालिकेच्या महासभेसमोर मांडावा आणि त्यास मान्यता मिळवून द्यावी, अशी मागणी भाजपच्या वतीने करण्यात आली आहे. यासोबत निवेदनाची छायांकित प्रतही देण्यात आली आहे.










