६८.८९१ टन कांदा खरेदी करून ६.७२ लाख रुपये थकवल्याचा आरोप
सांगली | प्रतिनिधी : सांगली कृषी उत्पन्न बाजार समितीच्या विष्णुअण्णा फळ मार्केटमधील कांदा-बटाटा विभागातील व्यापाऱ्याची तामिळनाडूतील दोन व्यापाऱ्यांनी १२ लाख ७२ हजार ७५० रुपयांची फसवणूक केल्याचा प्रकार उघडकीस आला आहे. विश्वास संपादन करून मोठ्या प्रमाणात कांदा खरेदी केल्यानंतर काही रक्कम अदा करून उर्वरित पैसे थकवल्याचा आरोप आहे. याप्रकरणी सांगली शहर पोलीस ठाण्यात दोघांविरुद्ध गुन्हा दाखल करण्यात आला आहे.
याबाबत शाहूखान बालोचदाद बागवान (वय ३३, रा. पत्रकानगर, कोल्हापूर रोड, सांगली) यांनी पोलिसांत फिर्याद दिली आहे. त्यांची विष्णुअण्णा फळ मार्केटमध्ये कांदा, बटाटा आणि लसूण विक्रीची कमिशन एजंट म्हणून फर्म आहे.
संशयित महमद अनस ए. (वय ४८, रा. गुडूर बाजार, तामिळनाडू) आणि यासर अरफात (रा. उटी, तामिळनाडू) यांनी तामिळनाडूमधील मेघालयम येथे ‘लाना ट्रेडिंग’ नावाने कांदा-बटाटा विक्रीची मोठी फर्म असल्याचे सांगितले होते. या ओळखीच्या आधारे दोघांनी फिर्यादीचा विश्वास संपादन केला.
त्यानंतर १५ जुलै ते १७ ऑगस्ट या कालावधीत त्यांच्या फर्मकडून एकूण ६८.८९१ टन कांदा खरेदी करून तामिळनाडूला नेण्यात आला. या कांद्याची एकूण किंमत १२ लाख ७२ हजार ७५० रुपये होती. त्यापैकी संशयितांनी फिर्यादीच्या बँक खात्यावर केवळ ६ लाख ७० हजार रुपये जमा केले. उर्वरित ६ लाख ७२ हजार ७५० रुपये देण्यास टाळाटाळ केल्याचे फिर्यादीत नमूद आहे.
या प्रकरणी पोलिसांनी साक्षीदारांचे जबाब नोंदविले असून पुढील तपास सुरू आहे. व्यापाऱ्यांशी मोठे आर्थिक व्यवहार करताना योग्य कागदपत्रे, बँक व्यवहार आणि आर्थिक हमी यांची खातरजमा करण्याची गरज या घटनेतून अधोरेखित झाली आहे.










