नियमबाह्य वाद्यांना मनाई; मंडळांना एक दिवस आधी वाद्य वाजवून दाखवावे लागणार
उपविभागीय पोलीस अधिकारी किरण कुमार भोंडवे यांच्या शांतता बैठकीत कडक सूचना
श्रीक्षेत्र माहूर | प्रतिनिधी : आगामी सण-उत्सवांच्या पार्श्वभूमीवर माहूर पोलीस ठाण्याच्या वतीने शांतता समितीच्या बैठकीचे आयोजन करण्यात आले होते. या बैठकीत शासन आणि न्यायालयाच्या आदेशांची कठोर अंमलबजावणी करण्यात येणार असल्याचे स्पष्ट करत, केवळ शासनमान्य पारंपरिक वाद्यांना परवानगी असलेल्या मिरवणुकांनाच मंजुरी दिली जाईल, असा कडक इशारा उपविभागीय पोलीस अधिकारी किरण कुमार भोंडवे यांनी दिला.
माहूर शहरातील सण-उत्सवांच्या मिरवणुकांमध्ये यापूर्वी डीजे आणि मानवी शरीराला हानिकारक ठरू शकणारी इतर वाद्ये वाजविली जात असल्याचे निदर्शनास आले आहे. मात्र, शासन आणि न्यायालयाच्या आदेशांनुसार केवळ परवानगी असलेली वाद्येच वाजविणे बंधनकारक असल्याचे भोंडवे यांनी स्पष्ट केले.
मिरवणूक काढणाऱ्या मंडळांनी शपथपत्रासह अर्ज सादर करावा. तसेच मिरवणुकीत वाजविण्यात येणारे वाद्य एक दिवस आधी पोलीस प्रशासनासमोर वाजवून दाखवावे लागेल. त्यानंतरच नियमानुसार मिरवणुकीला परवानगी देण्यात येईल. नियमबाह्य वाद्ये वाजविल्यास संबंधित मंडळांची भविष्यातील मिरवणुकीची परवानगी कायमस्वरूपी रद्द करण्यात येईल, असा इशाराही त्यांनी दिला.
या बैठकीला पोलीस निरीक्षक देविदास चोपडे, सहाय्यक पोलीस निरीक्षक शरद घोडके, भाजपचे डॉ. निरंजन केशवे, काँग्रेसचे तालुकाध्यक्ष आनंद पाटील तुपदाळे, शिंदे सेनेचे विनोद पाटील सूर्यवंशी, एमआयएमचे तालुकाध्यक्ष सज्जाद शेख, इर्शाद मकरानी, शेख मोसिन, गोपनीय शाखेचे गजानन जाधव यांच्यासह विविध क्षेत्रांतील मान्यवर उपस्थित होते.











