युवा शेतकरी संघर्ष समितीला सोबत घेऊन नागपुरात पत्रकार परिषद; मागणी मान्य न झाल्यास आक्रमक आंदोलनाचा इशारा
नागपूर | प्रतिनिधी : कापूस उत्पादक शेतकऱ्यांच्या प्रश्नांना वाचा फोडण्यासाठी वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी नागपूर येथे युवा शेतकरी संघर्ष समितीच्या पदाधिकाऱ्यांसोबत पत्रकार परिषद घेतली. विदेशी कापसाच्या आयातीवरील शुल्क माफ करण्याच्या निर्णयाला विरोध दर्शवत विदेशी कापसावर २० टक्के आयात शुल्क लागू करण्याची मागणी यावेळी करण्यात आली.
केंद्र सरकारने कापूस आयातीवरील शुल्क कमी केल्यामुळे देशांतर्गत कापसाच्या बाजारभावावर परिणाम होत असल्याचा दावा यावेळी करण्यात आला. याचा थेट आर्थिक फटका कापूस उत्पादक शेतकऱ्यांना बसत असल्याचे ॲड. आंबेडकर यांनी सांगितले. आधीच उत्पादन खर्च, मजुरी आणि इतर वाढत्या खर्चामुळे अडचणीत असलेल्या शेतकऱ्यांच्या समस्यांकडे सरकारने गांभीर्याने लक्ष द्यावे, अशी मागणीही करण्यात आली.
यावेळी ॲड. प्रकाश आंबेडकर यांनी सरकारला दहा दिवसांचा अल्टिमेटम देत हिवाळी अधिवेशनापूर्वी कापूस उत्पादक शेतकऱ्यांचा प्रश्न मार्गी लावण्याची मागणी केली. अन्यथा आगामी काळात आक्रमक आंदोलन उभारण्यात येईल, असा इशारा त्यांनी दिला. हे आंदोलन नेहमीच्या पद्धतीपेक्षा वेगळ्या स्वरूपात असेल, असेही त्यांनी स्पष्ट केले.
युवा शेतकरी संघर्ष समितीच्या माध्यमातून मराठवाड्यातील सर्व शेतकरी संघटनांना एकत्र आणून व्यापक लढा उभारण्यात येणार आहे. या आंदोलनात युवा पिढीचाही मोठ्या प्रमाणावर सहभाग घेतला जाणार असल्याचे ॲड. आंबेडकर यांनी सांगितले.
मुख्यमंत्री आणि केंद्रीय मंत्र्यांनी कापूस उत्पादक शेतकऱ्यांच्या प्रश्नाकडे गांभीर्याने लक्ष देऊन तातडीने निर्णय घ्यावा, अशी मागणीही यावेळी करण्यात आली. सरकारने दहा दिवसांत निर्णय न घेतल्यास पुढील आंदोलनाची दिशा ठरवण्यात येईल, अशी भूमिका युवा शेतकरी संघर्ष समितीने मांडली.
शेतकऱ्यांच्या न्याय्य हक्कांसाठी युवा शेतकरी संघर्ष समिती या लढ्यात खांद्याला खांदा लावून उभी राहणार असल्याचे समितीच्या वतीने स्पष्ट करण्यात आले.











