पूज्य भंते बी. संघपालजी महाथेरो व भंते श्रद्धापालजी यांचे मार्गदर्शन; बुद्ध, धम्म आणि संघ या त्रिरत्नांवर श्रद्धा ठेवण्याचे आवाहन
आलेगाव | प्रतिनिधी : आलेगाव येथे पूज्य भंते बी. संघपालजी महाथेरो आणि पूज्य भंते श्रद्धापालजी यांच्या प्रमुख उपस्थितीत धम्मप्रवचनाचा कार्यक्रम उत्साहात पार पडला. यावेळी त्यांनी उपस्थितांना सदाचाराचा संदेश देत बुद्ध, धम्म आणि संघ या त्रिरत्नांवर श्रद्धा ठेवण्याचे आवाहन केले.
पत्रकार मंगल आनंदा तेलगोटे यांच्या घरी कु. अन्वी मंगल तेलगोटे हिचा पाचवा वाढदिवस शुक्रवार, दि. २० नोव्हेंबर २०२६ रोजी धम्ममय वातावरणात साजरा करण्यात आला. या कार्यक्रमाला दोन्ही पूज्य भंते यांची प्रमुख उपस्थिती लाभली.
सकाळी १० वाजून ३० मिनिटांनी दोन्ही भंते यांचे आगमन झाले. त्यांच्या आगमनाने परिसरात मंगलमय वातावरण निर्माण झाले. महिलांनी पारंपरिक पद्धतीने सुंदर रांगोळ्या काढून आणि फुलांचा वर्षाव करून दोन्ही पूज्य भंते यांचे स्वागत केले.
त्यानंतर पूज्य भंते यांनी परित्राण पाठ घेतला आणि भोजनदानाचा स्वीकार केला. भोजनदानानंतर त्यांनी उपस्थितांना धम्मप्रवचनातून मार्गदर्शन केले.
प्रवचनात भंते यांनी सांगितले की, माणसाच्या जीवनातील सुख आणि दुःख हे त्याच्या स्वतःच्या कर्मावर अवलंबून असते. आपल्या सुख-दुःखाला दुसरे कोणीही जबाबदार नसून, आपण केलेल्या कर्मांचे फळ आपल्यालाच भोगावे लागते. कुशल कर्म केल्यास त्याचे परिणाम चांगले मिळतात, तर अकुशल आणि वाईट कर्म केल्यास त्याचे परिणामही वाईटच मिळतात.
भगवान गौतम बुद्ध हे मानवजातीला योग्य मार्ग दाखवणारे मार्गदाते आहेत. त्यामुळे प्रत्येकाने बुद्ध, धम्म आणि संघ या त्रिरत्नांवर श्रद्धा ठेवून सदाचाराचा मार्ग स्वीकारावा, असा मोलाचा संदेश त्यांनी दिला. तसेच समता, बंधुता, प्रज्ञा, करुणा, मैत्री, शांती आणि मानवतेचे महत्त्वही पटवून दिले.
यावेळी गावातील बौद्ध उपासक-उपासिका, बालक-बालिका, नातेवाईक आणि पाहुणे मोठ्या संख्येने उपस्थित होते. उपस्थितांनी भंते यांना दान देऊन पुण्यसंचय केला. संपूर्ण कार्यक्रम भक्तिमय आणि आनंददायी वातावरणात पार पडला.
कार्यक्रमाचे सूत्रसंचालन आयु. प्रवीण शिरसाट (बौद्धाचार्य) यांनी केले. कु. अन्वीच्या वाढदिवसानिमित्त आयोजित या कार्यक्रमातून केवळ आनंदोत्सव न साजरा करता बुद्धांच्या विचारांचा आणि धम्मसंस्कारांचा संदेश समाजापर्यंत पोहोचविण्यात आला.











