मेहकरमध्ये केंद्रीय मंत्री प्रतापराव जाधव यांच्या वाढदिवसानिमित्त सेवा सप्ताह; संगीतमय सुंदरकांड पाठाला हजारो भाविकांची उपस्थिती
मेहकर | प्रतिनिधी : केंद्रीय मंत्री ना. प्रतापराव जाधव यांच्या वाढदिवसानिमित्त मेहकर शहरात सेवा सप्ताहाचे आयोजन करण्यात आले आहे. या सप्ताहात दररोज दुपारच्या सत्रात भव्य रामकथा यज्ञ, तर सायंकाळच्या सत्रात विविध कीर्तनांसह भक्तिमय कार्यक्रमांचे आयोजन केले जात आहे. सेवा सप्ताहाच्या तिसऱ्या दिवशी विदर्भ कन्या प. पू. मीरा अलकाश्रीजी यांच्या सुमधुर वाणीतून भव्य संगीतमय रामचरितमानस सुंदरकांड पाठाचा सामूहिक कार्यक्रम पार पडला.
यावेळी मार्गदर्शन करताना प. पू. मीरा अलकाश्रीजी यांनी सांगितले की, मनुष्याने वैयक्तिकरीत्या केलेल्या सुंदरकांड पाठाचे महत्त्व आहेच; मात्र सामूहिक सुंदरकांड पाठ केल्याने शंभर यज्ञांचे फळ प्राप्त होते, अशी धार्मिक मान्यता आहे. तसेच माणसाने आयुष्यात केलेले दान आणि केलेली भक्ती यांचा गाजावाजा करू नये. दान आणि भक्ती ही नेहमी निःस्वार्थ भावनेने व गुप्तपणे करावी, असे त्यांनी आवर्जून सांगितले.
भगवान श्रीराम आणि हनुमान यांच्या जीवनातील आदर्श प्रत्येकाने आपल्या आचरणात आणावेत, असे आवाहन त्यांनी केले. माता सीतेच्या जीवनावरही त्यांनी प्रकाश टाकला. संत-महंत समाजाला नेहमी सत्याच्या मार्गावर चालण्याची शिकवण देतात. त्यामुळे प्रत्येकाने रामकथा, भागवत, रामायण आणि महाभारत यांसारख्या धार्मिक ग्रंथांचे श्रवण करावे. त्यातील विचार दैनंदिन जीवनात उपयुक्त ठरतात, असेही त्यांनी सांगितले.
संगीतमय सुंदरकांड पाठ आणि हनुमानाच्या पराक्रमाचे वर्णन करताना त्यांनी सुमारे १५ वर्षांपूर्वी मेहकर शहरातील एमईएस हायस्कूलच्या प्रांगणातही भव्य सुंदरकांड पाठाचे आयोजन झाल्याची आठवण सांगितली.
या कार्यक्रमाला हजारो भाविकांनी उपस्थित राहून सुंदरकांड पाठाचा आनंद घेतला. ‘जय हनुमान’ आणि ‘जय श्रीराम’च्या जयघोषाने संपूर्ण परिसर भक्तिमय झाला होता. हा अद्भुत सोहळा अनुभवताना भाविकांच्या चेहऱ्यावर आनंद आणि समाधान दिसून येत होते.
‘ऐहलोकीचा देव या जगतात कुठेही नाही,’ या भावनेतून भक्तांनी या भक्तिमय सोहळ्याचा अनुभव घेतला.










