राजेंद्र टोपले , सुरगाणा
उंबरठाण महाविद्यालयात सांस्कृतिक स्पर्धांचा उत्स्फूर्त समारोप
डांग सेवा मंडळाचे, कला व वाणिज्य महाविद्यालय, उंबरठाण येथे शैक्षणिक वर्ष २०२५–२६ अंतर्गत आयोजित करण्यात आलेल्या सांस्कृतिक डे व स्पर्धांचा उत्साहपूर्ण वातावरणात यशस्वी समारोप झाला. तीन दिवस चाललेल्या या उपक्रमात विद्यार्थ्यांनी मोठ्या संख्येने सहभाग नोंदवून आपल्या विविध कलागुणांची प्रभावी झलक सादर केली.
या स्पर्धांमध्ये साडी-डे/टाय-डे, ग्लास वेचणे स्पर्धा, संगीत खुर्ची, पुष्परचना, लगोरी स्पर्धा, मेहंदी स्पर्धा, गीतगायन/काव्यवाचन स्पर्धा, सामूहिक पारंपरिक नृत्य तसेच ‘बालविवाह’ या सामाजिक विषयावर विद्यार्थिनीसाठी स्वतंत्र निबंध स्पर्धा आणि दोन्ही विद्यार्थी व विद्यार्थिनीसाठी ‘आर्थिक व्यवस्थापन’ या विषयावर निबंध स्पर्धांचा समावेश होता. प्रत्येक स्पर्धेला विद्यार्थ्यांचा उत्स्फूर्त प्रतिसाद लाभला.
विद्यार्थ्यांनी सर्जनशीलता, आत्मविश्वास आणि सांस्कृतिक परंपरांप्रती जपलेली निष्ठा यांचे उत्कृष्ट प्रदर्शन केले. गुणवंत विद्यार्थ्यांना ट्रॉफी व प्रमाणपत्र देऊन लवकरच गौरविण्यात येणार आहे.
सांस्कृतिक कार्यक्रमाचे समन्वयक म्हणून प्रा. राजाराम कणसे, प्रा. तुळशीराम चौधरी आणि प्रा. सारिका पागी यांनी जबाबदारी यशस्वीरीत्या पार पाडली. महाविद्यालयाचे प्रभारी प्राचार्य डॉ. एकनाथ आहेर, आयक्यूएसी समन्वयक प्रा. सुभाष पवार, इतिहास विभागप्रमुख प्रा. कलावती थविल, सहायक प्रा. राजेश पेटार, अर्थशास्त्र विभागप्रमुख प्रा. मंदिप राऊत, वाणिज्य विभागप्रमुख प्रा. किशोर काळे, सहायक प्रा. हेमलता महाले, ग्रंथपाल मधुकर गावित तसेच शिक्षकेत्तर कर्मचारी श्री. अनिल कदम, श्री. अनिल ठाकरे, श्री. हिरामण गावित व श्रीमती यशोदा गावित यांच्या मार्गदर्शनाखाली स्पर्धांचे नियोजन व आयोजन करण्यात आले. या कार्यक्रमामुळे महाविद्यालयीन वातावरणात आनंद, उत्साह आणि स्नेहभावना वृद्धिंगत झाल्याचे मत उपस्थितांनी व्यक्त केले.
