शिरपूर प्रतिनिधी
शासकीय अनुदानासाठी सादर करण्यात आलेली यादी प्रमाणित करून देण्यासाठी ५ हजार रुपयांची लाच मागून स्वीकारताना शिरपूर तालुका कृषी कार्यालयातील डाटा एंट्री ऑपरेटरला लाचलुचपत प्रतिबंधक विभागाने रंगेहात पकडले. या प्रकरणी संबंधित कर्मचाऱ्यासह तालुका कृषी अधिकाऱ्यावर गुन्हा दाखल करण्यात आला आहे.
लाचलुचपत प्रतिबंधक विभाग, धुळे यांच्या माहितीनुसार, सुनिल धनराज पाटील (वय ३१), डाटा एंट्री ऑपरेटर, तालुका कृषी कार्यालय, शिरपूर यांनी तक्रारदाराकडून ५ हजार रुपयांची लाच मागितली होती. तसेच या मागणीस तालुका कृषी अधिकारी संजय हिम्मतराव पवार (वय ४३) यांनी दुजोरा दिल्याचे निष्पन्न झाले आहे.
तक्रारदार यांचे मौजे बभळाज (ता. शिरपूर) येथे शासनमान्य बियाणे व खत विक्रीचे दुकान आहे. Maharashtra State Seeds Corporation मार्फत राष्ट्रीय अन्न सुरक्षा व पोषण अभियानांतर्गत गव्हाचे प्रमाणित बियाणे वितरित केले जाते. सन २०२५-२६ मध्ये तक्रारदारांनी ९० शेतकऱ्यांना अनुदानित गव्हाचे बियाणे विक्री केले होते. त्याअनुषंगाने सुमारे १ लाख ४० हजार रुपयांचे शासकीय अनुदान मिळण्यासाठी आवश्यक कागदपत्रांसह शेतकऱ्यांची यादी दि. १० फेब्रुवारी २०२६ रोजी तालुका कृषी कार्यालयात सादर करण्यात आली होती.
यादी प्रमाणित करण्यासाठी ५ हजार रुपये द्यावे लागतील, अशी मागणी सुनिल पाटील यांनी केल्याची तक्रार दि. ११ फेब्रुवारी रोजी लाचलुचपत प्रतिबंधक विभागाकडे करण्यात आली. पंचासमक्ष पडताळणीमध्ये लाचेची मागणी झाल्याचे स्पष्ट झाल्यानंतर दि. १२ फेब्रुवारी २०२६ रोजी सापळा रचण्यात आला. यावेळी सुनिल पाटील यांनी तक्रारदाराकडून ५ हजार रुपये स्वीकारताना पंचासमक्ष रंगेहात पकडण्यात आले.
यानंतर सुनिल पाटील व संजय पवार यांच्याविरुद्ध शिरपूर शहर पोलीस ठाण्यात गुन्हा दाखल करण्यात आला आहे. ही कारवाई पोलीस उपअधीक्षक सचिन साळुंखे (पर्यवेक्षण अधिकारी) यांच्या मार्गदर्शनाखाली पोलीस निरीक्षक श्रीमती पद्मावती कलाल (सापळा अधिकारी) व पथकातील अधिकारी-कर्मचारी यांनी केली.
या पथकात पोलीस निरीक्षक यशवंत बोरसे, पोहेकॉ. राजन कदम, मुकेश अहिरे, प्रविण मोरे, संतोष पावरा, पोकॉ. मकरंद पाटील, प्रशांत बागुल, प्रविण पाटील, प्रितेश चौधरी, मपोकॉ. रेश्मा परदेशी, पोहेकॉ. सुधीर मोरे आदींचा समावेश होता. सदर कारवाईस Bharat Tangde (पोलीस अधीक्षक), माधव रेडी (अपर पोलीस अधीक्षक) व सुनिल दोरगे (अपर पोलीस अधीक्षक, लाचलुचपत प्रतिबंधक विभाग, नाशिक परिक्षेत्र) यांचे मार्गदर्शन लाभले.
पुढील तपास सुरू आहे.
