रिसोड | प्रतिनिधी
रिसोड शहरातील जुनी सराफ लाईन (धोबी गल्ली) येथे संत गाडगे बाबा यांची जयंती उत्साहात आणि भक्तिभावाने साजरी करण्यात आली. यावेळी संत गाडगे बाबा यांच्या प्रतिमेला पुष्पहार अर्पण करून पूजन करण्यात आले.
जयंतीनिमित्त विविध सामाजिक व सांस्कृतिक कार्यक्रमांचे आयोजन करण्यात आले होते. काही नागरिकांनी गाडगे बाबा यांच्या विविध वेशभूषा साकारत त्यांच्या कार्याची आठवण करून दिली. स्वच्छतेचे खरे प्रणेते, अंधश्रद्धा निर्मूलनाचे पुरस्कर्ते आणि शिक्षणाचे महत्त्व समाजाला पटवून देणारे समाजसुधारक म्हणून गाडगे बाबा यांचे कार्य अधोरेखित करण्यात आले.
कार्यक्रमास धोबी गल्ली परिसरातील नागरिक मोठ्या संख्येने उपस्थित होते. यावेळी उपस्थितांनी संत गाडगे बाबा यांच्या कार्याला विनम्र अभिवादन करून त्यांच्या विचारांचा आदर्श समाजात रुजवण्याचा संकल्प व्यक्त केला.
