दापोली(प्रतिनिधी) : दापोली तालुक्यातील नानटे सजा येथील ग्राम महसूल अधिकारी श्रीमती श्रद्धा बालाजी बंडे (वय ३०) यांना आज दुपारी दापोली तहसीलदार कार्यालयातील एका सभागृहात १० हजार रुपयांची लाच स्वीकारताना लाचलुचपत प्रतिबंधक विभाग (रत्नागिरी) पथकाने रंगेहात पकडले.
या कारवाईमुळे दापोलीत खळबळ उडाली आहे.मिळालेल्या माहितीनुसार, तक्रारदाराने मौजे तेरेवायंगणी येथील गट क्रमांक ३११ मधील ७८ गुंठे जमीन खरेदी केली होती. संबंधित जमिनीच्या ७/१२ उताऱ्यावर नाव नोंद करण्यासाठी त्यांनी तलाठी कार्यालयाशी संपर्क साधला होता.
यावेळी फेरफार नोंद करून सातबारा उतारा देण्यासाठी संबंधित ग्राम महसूल अधिकारी श्रद्धा बंडे यांनी तक्रारदाराकडे १० हजार रुपयांची मागणी केल्याचे समोर आले.तक्रारदाराने २४ फेब्रुवारी रोजी पुन्हा भेट घेऊन खरेदी खताची नोंद मंजूर करून फेरफार व सातबारा उतारा देण्याची विनंती केली असता, त्यासाठीही १० हजार रुपयांची मागणी करण्यात आली.
त्यानंतर तक्रारदाराने याबाबत लाचलुचपत प्रतिबंधक विभागाकडे तक्रार नोंदवली.तक्रारीची पडताळणी केल्यानंतर आज, २५ फेब्रुवारी २०२६ रोजी सापळा कारवाई करण्यात आली. या कारवाईदरम्यान संबंधित तलाठी यांनी पंचासमक्ष लाचेची रक्कम स्वीकारली. त्यानंतर पथकाने त्यांना तात्काळ ताब्यात घेतले.
या कारवाईत रत्नागिरी येथील लाचलुचपत प्रतिबंधक विभागाचे पोलीस उपअधीक्षक अविनाश पाटील, पोलीस निरीक्षक मच्छिन्द्र जाधव, सुहास रोकडे, सहाय्यक पोलीस उपनिरीक्षक सुहास चांदणे, हवालदार श्रेया विचारे, दीपक आंबेकर, राजेश गावकर आणि समिता क्षीरसागर यांनी सहभाग घेतला.
दुपारच्या सत्रात तहसीलदार कार्यालयातील सभागृहातच ही कारवाई पार पडल्याने महसूल विभागात एकच खळबळ उडाली असून पुढील तपास सुरू आहे.
