राष्ट्रीय विज्ञान दिनानिमित्त ग्रामीण विकास विद्यालय, सालवा येथे विज्ञानप्रेमी वातावरणात विविध उपक्रमांचे आयोजन करून दिवस उत्साहात साजरा करण्यात आला. राज्य विज्ञान शिक्षण संस्था आणि विद्यालय यांच्या संयुक्त विद्यमाने आयोजित करण्यात आलेल्या या कार्यक्रमात विज्ञान प्रदर्शनी, प्रात्यक्षिके आणि मार्गदर्शनपर व्याख्यानांचा समावेश होता.
कार्यक्रमाच्या उद्घाटन समारंभाला संस्थेचे सचिव विजयराव कठाळकर अध्यक्ष म्हणून उपस्थित होते. राज्य विज्ञान शिक्षण संस्थेच्या वरिष्ठ अधिव्याख्याता डॉ. हेमलता बांबल यांच्या हस्ते कार्यक्रमाचे उद्घाटन करण्यात आले. प्रमुख मार्गदर्शक म्हणून शिवाजी विज्ञान महाविद्यालयाचे सहयोगी प्राध्यापक डॉ. सारंग धोटे, प्रमुख अतिथी म्हणून राज्य विज्ञान शिक्षण संस्थेचे सहाय्यक शिक्षण उपनिरीक्षक जयेश वाकोडकर तसेच विद्यालयाचे पर्यवेक्षक शेषराज पेंदाम यांची उपस्थिती कार्यक्रमास लाभली.
विज्ञान प्रदर्शनीत विद्यार्थ्यांनी विविध वैज्ञानिक संकल्पनांवर आधारित प्रयोग सादर केले. ऊर्जा संवर्धन, पर्यावरण संरक्षण, दैनंदिन जीवनातील समस्या सोडवणारे उपकरणे, तसेच इलेक्ट्रॉनिक्स आणि रोबोटिक्सवरील प्रकल्पांनी उपस्थितांचे विशेष लक्ष वेधले. विद्यार्थ्यांनी आत्मविश्वासाने आपले प्रकल्प सादर करत विज्ञानाविषयीची जिज्ञासा आणि सर्जनशीलता दाखवून दिली.
मार्गदर्शनपर सत्रात मान्यवरांनी विज्ञान शिक्षणाचे महत्त्व अधोरेखित केले. विद्यार्थ्यांनी जिज्ञासू वृत्ती ठेवून सतत प्रयोगशील राहावे, नवीन कल्पना विकसित कराव्यात आणि त्यांना प्रत्यक्षात उतरविण्याचा प्रयत्न करावा, असे आवाहन करण्यात आले. विज्ञान हे केवळ पाठ्यपुस्तकापुरते मर्यादित नसून ते जीवनाशी जोडलेले आहे, याची जाणीव विद्यार्थ्यांना करून देण्यात आली.
कार्यक्रमादरम्यान राज्यस्तरीय बालवैज्ञानिक प्रदर्शनीत प्रथम क्रमांक मिळवलेल्या विद्यार्थी मोहित राऊत याचा विशेष सत्कार करण्यात आला. त्याच्या यशाबद्दल विद्यालय परिवाराने अभिमान व्यक्त केला.
कार्यक्रमाचे प्रास्ताविक लक्ष्मीकांत बांते यांनी केले. सूत्रसंचालन मयूर भोंबे यांनी तर आभार प्रदर्शन ममता नारनवरे यांनी मानले. कार्यक्रमाच्या यशस्वीतेसाठी विद्यालयातील सर्व शिक्षक व शिक्षकेतर कर्मचाऱ्यांनी परिश्रम घेतले.
या उपक्रमामुळे विद्यार्थ्यांमध्ये विज्ञानाविषयी आवड निर्माण झाली असून वैज्ञानिक दृष्टिकोन रुजविण्याच्या दिशेने विद्यालयाने एक महत्त्वपूर्ण पाऊल टाकले आहे.
